Despues di e caso den Corte siman pasa di Gobierno contra sindicato SADA cu a bay den welga cu su miembronan, e sindicato a mustra su disponibilidad pa sinta na mesa prome cu nan cuminsa tuma pasonan pertinente.

Diabierna, 13 di september, Abogado Duijneveld, como consehero legal di SADA a dal e prome paso pa acerca Gobierno pa trata di yega na un areglo den e “cooling off period” cu Corte a pone y cual ta vence dia 12 di october.

Mustrando nan disponibilidad a manda e carta den cual nan ta bisa Minister di Finanza cu prome cu tuma otro pasonan legal, un biaha mas ta duna e mandatario e oportunidad pa regla e asunto aki di un forma trankil.

E Abogado a pidi pa haya por escrito ki tempo ta ehecuta e Convenant firma 21 di juli, 2017. Na mesun momento ta recorda e mandatario cu e posicion tuma den e reunion di dia 9 di februari y loke su representantenan legal a trece dilanti den e caso den Corte, ta haci dificil pa trata di yega na un acuerdo riba e asunto aki. Den Corte a bisa cu e lo nifica gasto extra pa Gobierno cu nan no por haci awo. A mustra na e mandatario con Corte mes a cuestiona e falta di confiansa cu esaki ta nifica pa persona- of instancianan cu tin un acuerdo cu Gobierno pa cual a mustra comprension pa e posicion tuma door di SADA.

Mirando e situacion aki ta pidi Gobierno no mas tarda diamars, invita SADA pa un reunion, den cual e unico topoco ta fecha di implementacion di e Convenant. Y a pone bon cla cu kiebro di e Convenant no ta algo discutibel. Na final ta adverti cu si no logra yega na un acuerdo, no ta keda nan nada otro pa hiba e caso aki Corte, den un bodemprocedure.

Gobierno ta mustra di ta mal para den e caso aki. Esaki ta un acuerdo cu firma na juli, 2017, y no ta algo cu awo dos aña despues ta bisa cu no ta bay respeta esaki. Si ta basa riba conseho ricibi na december, 2018, no ta ehecuta e Convenant, e pregunta haci ta: di con a sinta toch na mesa cu e sindicato tur e lunanan di e aña’ki.

Gobierno ta bisa cu e tin problema pa ehecuta e Convenant pa motibo cu e ta un pugna cu LMA y e lo nifica un suma adicional di 50 miyon florin pa aña. SADA a mustra cu e suma pa cumpli cu e Convenant ta hinca caba den presupuesto 2018.

Mas problema

Ademas di SADA, Gobierno tin diferente problemanan mas cu ta escalando di cual un di na ta e malcontento den sector di enseñansa, y por a sinti durante entrega di carta diabierna ultimo cu, e maestronan cualkier momento ta bay pone trabou abou. Ya caba nan no kier atende nada mas cu Minister di Enseñansa cu no ta respeta esnan di e sector aki, segun e diferente declaracionnan duna.

Banda di e problema aki, tin e introduccion di Sugar Tax, cu ta den evaluacion segun Gobierno, pero cu ya caba a crea hopi controversia. Su introduccion lo nifica hopi problema, bancarota di diferente compania,  retiro di trahadonan, poder di compra cu ta cay, etc. Tur esaki pa un falta di consulta cu gremionan concerni. E pregunta ta: cuanto mas e Gobierno por wanta

Comments

comments