SADA: Ainda trahadonan di Aduana ta wardando riba nan aumento

Ademas di indexering, ainda tin algun situacion cu Aduana ta pendiente di dje pa loke ta pago, aumento of loke sea cu tin cu tuma luga.

Segun presidente di SADA, Edward Maduro, tur loke cu ta pendiente a bay Raad van Advies. Aña pasa durante un conferencia e Minister encarga cu esaki a bisa cu e proceso ta canando  su caminda caba. Berdad e ta tardando mas di loke ta spera y esaki sigur ta poniendo un presion enorme riba e sindicato, mirando cu e miembronan constantemente ta acerca nan pa mira con leu e proceso ta.

Ya caba mas cu mita aña a bay y esaki sigur no ta loke nan a spera y tampoco e sindicato. E palabracion tabata pa keda cla mas lihe posibel. Aña pasa na juli a sinta cu Prome Minister. E tambe ta di opinion cu esaki tin cu keda cla mas lihe posibel. Mas e tarda, mas e ta keda acumula y no ta positivo tampoco pa Gobierno.

SADA: Ainda trahadonan di Aduana ta wardando riba nan aumento

SADA: Ainda trahadonan di Aduana ta wardando riba nan aumento. Click link pa mas https://24ora.tv/2xMAnKd

Posted by 24ora on Wednesday, July 10, 2019

Despues di esaki e tema aki varios biaha a bin den prensa pa loke ta trata e standpunt, te hasta unda cu Mediador di Gobierno tambe a keda envolvi. Awor aki no sa exactamente  con leu e ta, segun Maduro.

Loke e ta na altura di dje ta cu despues di RvA, e documentonan ta bay Directie Wetgeving, unda cu RvA a duna algun conseho ariba, unda cu Wetgeving mester a describi esakinan y for di eynan mand’e pa Gobierno p’asina e por finalisa e transcurso di e landsbesluit. Ta un landsbesluit HAM, unda cu tin cu firma y manda pa Gobernador. Te con leu cu sa, el a sali for di for di Wetgeving. Aparentemente mientrastanto el a yega Ministerraad, pero te eynan sa. Durante un combersacion informal cu Minister, el a bisa cu nan a hay’e, cual tabata mas of menos 1 luna of 1 luna y mey.

Aduana ta den un situacion dificil y esaki sigur e miembronan di SADA ta poniendo hopi presion. Nan ta hopi mal contento. Aparte di e salarishuis cu no ta kedando cla manera priminti, tin hopi aspecto den Aduana mes cu ta poniendo presion y esey tin di haber pa loke ta trata maneho di Aduana. A informa esaki na e minister.

T’asina cu tabatin un reunion na comienso di juni, y eyden a palabra cu na final mester a sigui cu e combersacionnan, pero esaki tambe a cancela. Awor aki ta en espera di e proximo reunion cu Minister, programa awor aki pa fin di juli. Prome cu esey a manda algun email pa e minister. “Tin hopi cos ta sosodiendo y sigur, como mandatario y hefe di Cuerpo di Aduana, e tambe mester ta envolvi, ora cu tin cosnan cu a sosode cu ta mira cu ta decisionnan descabeya y iresponsabel, pa loke ta trata e maneho di Aduana, unda cu sigur esaki por causa un subida den e gasto den personal.”

Esey ta un di e puntonan cu e Gobierno kier tene den control, cual ta gasto di personal. Pero ora cu ta mira e director ta tuma cierto decisionnan, cu ta premira caba cu esaki ta bay aumenta e gasto y si unabes bo kier spaar placa, cada florin cu bo gasta extra, ta dimas. Den e caso aki ta premira cu ta otro decision descabeya y iresponsabel di e director, unda cu a informa e Minister, pero te awor aki no a ricibi reaccion di su parti.

Esey ta e puntonan cu tin awor aki y tin hopi cos mas pendiente den Aduana.

Pago

Maduro a sigui splica cu aña pasa e pago lo ta coriendo den 600 mil florin, den henter 2018. E aña aki e ta core den e mesun tren cu no a keda paga. Por papia facilmente di mas di 1 miyon florin.

Maneho di Minister

Na comienso tabata tin un situacion un tiki dificil cu e Minister encarga. SADA cu ya caba tabata den un situacion dificil cu e director. A spera di a bay den e mesun trend y e mesun speed pa papia riba e asuntonan di Auana. Pero, mirando e tempo ey e Minister a caba di drenta den Gobierno, e mes kier a haci su propio assessment. Aki ta caminda cu por ta no a concorda cu otro den discusionnan y trece un solucion. Pero pa awo, e Minister lo mester a cuminsa ripara caba cu tin decisionnan cu ta tuma den Aduana. Un di e ehempelnan mas bibo y mas cla, ta e parti unda cu e director, contra tur regla y ley a bay nombra un persona cu no tin e cualidadnan den cierto rango y manda un carta pidi un promocion pa un persona of un colega, cu no ta bin na remarca. Esey ta djis pa duna un ehempel y a trece na atencion di e Minister, cu aki ta bypass ley. Unabes cu bypass ley, ya caba pa SADA, ta full robes bezig. Esey lo mester ta un wakeup call no solamente pa e Minister, pero e Gobierno tambe pa nan wak den ki situacion nan ta pasando aden.

Ultimatum of no

Den tur asunto, Maduro a bisa, SADA ta sigui deseo di miembronan. Nan ta hayando hopi presion di parti di e miembronan, cu ta mal contento. Tin varios factor cu ta hunga un rol y esey ta un discusion cu tin cu hiba cu e miembronan. Tempo lo demostra kico ta bay ta e proximo pasonan. Ta yega un momento cu no por warda mas. Tin mas cu un aña y mey ta wardando caba. Kico ta e motibo pa keda alarga esaki, nan no sa pasobra tur e caminda a wordo ana caba. Tur e parti di salarisstructuur tur hende tabata envolvi prome cu a firm’e na 2017. Tur e buraconan aki ta tapa, tin DRH envolvi, medewerkernan di Aduana envolvi. “No ta un cuestion cu ta un Minister ta tuma un decision riba su mes scondi. El a envolvi tur su departamentonan e tempo ey. Tur hende a chip in. DRH no por bin bisa cu e ta onterecht. Nan a bin cu e proposicion aki. Miembronan a bay di acuerdo, a acept’e y SADA ta den un situacion cu ta bon para pa sali. E boluntad mester bin di parti di Gobierno. Tin varios luna ta tratando di haya e Prome Minister tambe den un reunion. Na juli el a indica cu e kier pa esaki keda cla mas pronto posible y te dia di awe no a haya e reunion cu e prome mandatario. DRH ta cay bao di e Prome Minister. Tin algun asunto tranca cu DRH pa ehecucion di e salarisstructuur nobo aki. Eynan ta awor aki cu tin sigur dos pa tras luna wardando pa un reunio,” Maduro a bisa.

 

 

Comments

comments