Manera ta custumber di tur aña, Centro di Cuido San Nicolas, SABA tambe ta festeha Carnaval cu nan clientenanan. E aña aki no ta un excepcion.
A reina un ambiente super ameno, super dushi cu nos grandinan, unda cu for di trempan caba a cuminsa cu e preparacion di e clientenan. Tambe nan tabata tin coronacion di reina di entre nuebe candidata. Cuater tabata di habitante y cinco ta di e personal di e centro di cuido. Yvonne Geerman- Tromp, Guia di Actividad di Centro di Cuido San Nicolas, a bisa cu ta pa dos siman caba cu nan tabata druk, cu compra di material pa hinca e ideanan den otro. Nan ta masha contento cu nan a haya algun artista invita manera Eazy B, Casper, Wencly y tambe Sra. Carnaval, Gera.
El a sigui bisa cu e tin 15 aña como Guia di Actividad y nan tin 15 aña ta celebra Carnaval. Pero si cada aña ta diferente, pa nan no keda den e mesun rutina di tur aña. Nan ta hopi satisfecho con henter e actividad a cana. Ta varios siman di bin traha mainta trempan y bay cas laat, tur pa nan por keda cla cu tur e preparativonan di e actividad. Tabata hopi trabou, pero e satisfaccion cu nan tin di wak e exito di e actividad.
Tambe Geerman-Tromp a bisa cu tur e clientenan cu kier participa den nan actividad, ta bonbini. Meta di e actividadnan cu nan ta organisa ta pa promove movecion entre nan clientenan. Varios cliente no ta participa pa diferente motibo y esey nan ta respeta.
Na ultimo, Yvonne Geerman-Tromp a gradici tur esunnan cu a haci e actividad aki un exito, sin e ayudo lo no por a realisa e actividad aki.
Centro di Cuido San Nicolas ta desea un y tur un dushi carnaval. Ta pidi pa tur hende gosa sanamente. Ban sea consciente riba caminda. Uza amigo DIDI si bo ta bay stuur.
