Mayan diabierna mainta 9:00am Ryson Paskel ta para dilanti mesa berde pa tratamento di su caso penal. El a kita bida di un hoben di apenas 22 aña di edad, Camilo Carreño Sosa, durante un pelea dia 2 di september 2018.

E acusacion contra Ryson ta: Di intencionalmente a asesina un persona riba 2 di september 2018, dor di hink’e un of mas biaha cu un cuchiu. Tambe ta acus’e di ladronicia riba 28 di october 2017 y di menasa y maltrato dia 29 di juni 2018.

E hecho aki a sosode den e parkinglot di Arawak Gardens na Palm Beach. Ryson Paskel despues di e acto, a drenta un Toyota Pickup color cora y a huy.  El a keda fugitivo te 30 October 2018, ora cu a gar’e scondi den un cas na Santa Cruz.

Tempo cu Ryson a comete e delito aki, el a caba di sali di KIA pa un otro caso, pa cual su presentacion den Corte ya caba ta dificil y cu e record su tras ta bira pio. E acusacion aki ta similar na esun di Yeremy Ras kende a kita bida di su compañera Juraima Wouters, numa e diferencia ta cu un ta violencia domestico y e otro ta un acto di violencia riba caya.

Pa e acusacion aki tambe tin un castigo maximo di 20 aña. Pa impone 20 aña Fiscal y Hues ta tene cuenta cu diferente aspecto y circumstancianan rond di e caso. E tratamento probablemente lo finalisa mayan mes pero e sentencia casi sigur ta den tres siman.

Comments

comments