Ultimo tempo nos a mira con gobierno ta creando conflicto innecesario cu Hulanda y CAft. Ta acusa Hulanda di trapa riba nos derecho Constitucional y di viola e posicion di Parlamento. E argumentonan aki ta mentiroso pa e simpel motibo cu señora Evelyn Wever-Croes a pidi y haya bendicion di Parlamento pa por negocia cu Hulanda. Edgard Vrolijk cu awe ta grita duro cu Parlamento no a forma parti di e negociacionnan no kier bisa cu e mes ta un di esunnan cu a duna sosten completo na señora Evelyn Wever-Croes pa negocia cu Hulanda na nomber di henter Aruba.
Locual e politiconan aki tampoco ta bisa ta cu Aruba mes a opta pa un structura constitucional na unda Hulanda tin e tarea pa garantisa bon gobernacion y siguridad legal pa cada ciudadano. Den cuadro di siguridad legal nos a bay di acuerdo pa ancra henter nos sistema di cortenan den e leynan di Reino. P’esey nos tin acceso na Corte den Prome Instancia, Hof y Hoge Raad pa medio di leynan di Reino. Danki Dios nos tin e acceso na e cortenan aki, pasobra nos tur por mira con señora Evelyn Wever-Croes a gaña cu lo aplica bon gobernacion pero e realidad ta cu ciudadano mester bay hues pa gobierno cumpli cu ley.
Un ehempel ta e persecucion di Maurits Malmberg cu a ser kita for di trabao pa e unico motibo cu e tabata riba lista di AVP. E tempo ey ta abogado Geoffrey Wever a bringa y gana su caso, pero toch gobierno a prefera di paga compensacion en bes di haci lo husto. Nos por a mira director di DVG gana su caso, pero sin por eherce su funcion pa motibonan politico.
Awe tin un management team creando un aumento di gasto di personal sin tin mester. Mesun tipo di modus operandi nos por mira na DIMAS, unda cu gobierno claramente kier a pone e directora un banda sin tene cuenta cu nos Constitucion y e cuadro legal cu un minister mester respeta. E casonan den corte di Anouk Balentina relaciona violacion di leynan y un maneho desastroso di desperdicio. Duanero, polis y otro ambtenaar no tin otro manera cu bay hues pa exigi cumplimento di ley di un gobierno cu a priminti bon gobernacion.
Gobierno ta pretende di defende nos autonomia y kier bagatelisa e conseho di CAft pa gobierno haya un aanwijzing den forma di un KB. Pero gobierno no kier splica ni kico un aanwijzing of KB ta ni dicon gobierno ta na porta di haya un. E splicacion no ta dificil: autonomia ta nifica cu Reino ta zorg pa algun materia manera paspoort, defensa y garantisa bon gobernacion na Aruba (esaki ta e waarborgfunctie di Reino).
Tur topico cu no ta un asunto di Reino, ta un asunto interno cu ta pertenece na nos autonomia. Gobierno di Reino na Den Haag ta tuma su decisionnan den forma di KB of Koninklijk Besluit. P’esey un KB ta haya firma di Rey Willem-Alexander y un of mas minister Hulandes. E ta similar n’e LB (Landsbesluit) cu tin aki na Aruba cu ta un decision di gobierno. P’esey nos LB ta haya e firma di gobernador y un of mas minister. Gobierno di Reino/Hulanda ta uza e instrumento di KB pa nombra su ministernan, nos gobernador, pero tambe pa duna diferente tipo di instruccion den forma di un aanwijzing.
Gobierno di Reino tin e poder pa duna un aanwijzing na nos gobierno ora cu nos gobierno no ta cumpli cu un exigencia na nivel di Reino. Esey por ta incumplimento cu un rijkswet, of un Algemene Maatregel van Rijksbestuur of un protocol manera e protocolnan cu señora Evelyn Wever-Croes a firma cu Hulanda. Den un caso cu gobierno no ta cumpli cu e normanan den e documentonan aki gobierno di Reino por duna un instruccion pa nos gobierno cumpli (aanwijzing). Ta haci esey den forma di un KB. Si nos gobierno keda persisti den su incumplimento, a largo plaso gobierno ta core peliger cu nos ministernan lo mester pidi aprobacion di Hulanda pa cada transaccion di gobierno aki na Aruba.
