E decision di CAft pa duna conseho negativo pa brinda Aruba sosten financiero (likides) a bira un discusion politico riba nos isla. Esaki lo a bira e di shete tranche di fiansa y lo bira e di cuater pa e aña aki. E hecho cu Hulanda a pone pia abou pasobra Gabinete Wever-Croes no ta cumpli, a hala atencion mesora. Pa e miembro nobo di parlamento, mr. dr. Rycond Santos do Nascimento, e hecho cu Minister Plenipotenciario Guilfred Besaril ta purba bende un storia pa hustifica nan eror, ta locual mas ta indign’e.
“Den un comunicado di prensa, minister plenipotenciario Guilfred Besaril a bisa cu e ta hopi satisfecho cu e decision tuma den Conseho di Minister di Reino (RMR) di diabierna ultimo. Ta bon pa pone e declaracion aki den un perspectiva corecto”, asina e parlamentario di partido AVP a bisa awe, den un esfuerso pa duna un splicacion real di e situacion aki. Desde 2020 Aruba a haya 6 ‘cheques’ di Hulanda como apoyo di likides, pero bao condicion cu ta cumpli cu reformanan stipula den un landspakket.
Cada tres luna RMR ta controla 1) si tin mester di mas ayudo financiero y 2) si Aruba ta cumpliendo cu e exigencianan den landspakket. Pa Aruba haya su di shete ‘cheque’, Aruba mester a cumpli cu e exigencianan acorda. CAft ta kijk na si berdad nos mester di e ayudo ainda y si nos a cumpli.
Pa e ultimo ‘cheque’, CAft a constata cu Gabinete Wever-Croes bao guia di Minister di Finansas, Xiomara Maduro, no a cumpli y ta haya un dikke onvoldoende. P’esey COHO (eigenlijk e Tijdelijke Werkorganisatie) a bisa RMR pa no duna Aruba su di shete ‘cheque’.
Conclusion: Na e momento aki RMR no ta duna ningun ‘cheque’ pa 2021. Otro luna ora RMR ta bin hunto atrobe, Aruba ta haya un herkansing. “Mientrastanto ta toca na minister plenipotenciario Besaril e trabao ingrato pa bende e dikke onvoldoende di gobierno na pueblo. Su solucion ta pa insinua cu Aruba a logra un herkansing otro luna. Amigonan, Besaril no mester a haci nada pa tin un reunion di RMR otro luna, pasobra RMR semper ta bin hunto un biaha pa luna”, asina e parlamentario a informa.
Otro excusa straño ta cu gobierno tabata demisionario. Pero, Aruba a faya pa haya e di shete ‘cheque’, no e prome ni e di dos. Cu otro palabra: Cumplimento cu landspakket ta un ‘lopende zaak’ cu un gabinete demisionario mester a zorg p’e. Ta con Besaril lo a bende un diepe onvoldoende na su mama? Con bo ta splica cu bo no ta haya bo diploma te ora cu bo haal e herkansing? Simpel: ‘Ma, mi tin un super bon noticia! Examencommissie a dicidi cu lo dunami mi diploma manera cu mi haal mi herkansing otro luna…’
