Diahuebs 10 di april 2025, e president di Raad van Advies, mr. D.G. Kock, y secretario, mr. A. Braamskamp, a entrega un conseho na Minister-President y Minister di Finanzas tocante e creacion di fondo di presupuesto. Aparte di conseho legislativo, Raad van Advies por duna conseho tambe riba cierto asuntonan cu e ta considera di importancia special.
Aña pasa na mei, el a duna un conseho tocante e organisacion gubernamental. Den e mesun contexto, Raad ta pidi atencion pa un otro desaroyo cu tambe tin un efecto negativo riba e coherencia y union di maneho, cu ta e creacion di fondonan di presupuesto separa. Na cuminsamento di un periodo di gobernacion nobo, e ta considera e momento oportuno pa examina e desaroyo aki mas detaya.
Cu e conseho aki, Raad ta presenta un cuadro di evaluacion pa considera fondonan di presupuesto existente y futuro. Den su conseho, Raad ta duna un resumen di e fondonan di presupuesto cu ta existi awor y ta discuti e bentaha y desbentaha di fondonan di presupuesto. E conseho tambe ta trata su hallazgonan tocante e creacion di e fondonan di presupuesto existente, e fayonan cu a constata den e fondonan di presupuesto, e stipulacion di e presupuesto di e fondonan y e responsabilidad financiero relaciona cu esaki.
E conseho ta cera cu un conclusion y Raad ta duna su recomendacion. E recomendacion ta cu pa crea un fondo di presupuesto, mester demostra cu tin un necesidad cla pa esaki, y cu un fondo di presupuesto mester ta crea solamente pa proyectonan specifico di varios aña. Ademas, Raad ta recomenda pa inclui un clausula di evaluacion den e landsverordening unda un fondo di presupuesto ta wordo crea. Por haya e conseho riba e website: www.rva.aw.
