Diferente auto a bira victima di un chauffeur cu a pasa dal nan y core bay. Lagando un gran cantidad di daño atras y coriendo sin wak atras, e hoben aki a pasa di bario pa bario sin para.
Esaki a tuma luga den careda di 7:00 pm riba caminda di Paradera. Riba su ruta di destruccion el a bay laga dos ( te caminda cu nos tin informacion) vehiculo destrui, uno na Paradera y e otro cerca di Bright Bakery na Piedra Plat.
A cuminsa un persecucion for di Piedra Plat cu a drenta via Pavia, pasa patras di Hooiberg pa sali riba caminda grandi dilanti Well Well Restaurant. Aki a logra para e chauffeur di un Hyundai berde (A-51819) pa asina cuminsa saca afo ta kico por ta tumando luga cu ne.
A ripara mesora cu e ta bou influencia. A deten’e na e sitio y transport’e pa warda di polis. Afortunadamente unicamente daño material, susto y debe a keda, pasobra e por tabata pio y cu consecuencia devastado.
