Ministerio di Relacionnan Exterior di Rusia a manifesta cu e comunidad internacional mester centra den yuda na resolve e problemanan economico y social di Venezuela y abstene di cualkier interferencia “destructivo”, e agencia di noticia Interfax a informa.
“E obhetivo di e comunidad internacional mester ta pa yuda (pa Venezuela resolve e problemanan socioeconomico), sin entromete destructivamente for di p’afo di boso frontera,” Alexander Shchetinin, hefe di e departamento Latino Americano di e ministerio a sigura na Interfax.
Laga nos recorda cu, pa mey anochi di diadomingo ta vence un ultimatum duna na presidente Nicolas Maduro door di Francia, Spaña, Alemania, Reino Uni, Portugal y Hulanda pa e acepta “eleccionnan liber” of di lo contrario, nan lo reconoce e opositor, manera ya Merca y otro paisnan a haci.
Si e diadomingo aki, esta awe, 3 di Februari, “Maduro no compromete na organisa un eleccion presidencial, nos lo considera cu Guaido ta esun legitimo pa organis’e na su luga y nos lo consider’e como presidente interino te ora cu tin eleccionnan legitimo,” e Minister Frances pa Asuntonan Europeo, Nathalie Loiseau a bisa.
Di su banda, den un comunicado conhunto, Union Europeo (UE) y Uruguay a confirma cu e grupo di contacto internacional riba Venezuela lo tene su prome reunion dia 7 di Februari na Montevideo.
Hasta, e mainta di e diadomingo aki, e presidente di Merca, Donald Trump, a sigura den un entrevista na e cadena di television CBS, cu pa manda tropanan Venezuela, ta un “opcion” cu ta riba mesa.
E conflicto politico ta bibando mey mey di un crisis economico severo, cu hiperinflacion y escases di alimento y remedi, cu a pusha mas of menos 2.3 miyon di Venezolano den un exido desde 2015, segun Nacionnan Uni.
