Rueda di prensa relashoná ku klousura i apertura di aña Parlamentario

94

Djabièrnè 4 sèptèmber 2020 Presidente di Parlamento, sra. Ana Maria Pauletta a
tene un rueda di prensa relashoná ku klousura i apertura di aña parlamentario.
Apertura di aña parlamentario 2020-2021 lo ta djamars awor 8 sèptèmber pa 9or di
mainta i lo sosodé den un forma simplifiká debí na e situashon di Covid-19. Lo no tin
hopi invitado i tampoko lo hasi e seremonia militar.

Durante e rueda di prensa sra. Pauletta a menshoná algun “highlights” i kambio ku
tabatin durante e aña parlamentario tras di lomba. Un di e kambionan den e aña aki
ta ku den luna di mart Parlamento a hasi kambio den su reglamentu di òrdu pa por
reuní di forma digital den momentu nan di krísis i Covid-19.

Durante e aña parlamentario 2019-2020 tabatin un total di 36 reunion públiko di kual 22 a sosodé den sala di Parlamento i 14 tabata di forma virtual. Un total di 38 komishon sentral a tuma lugá di kual 26 tabata den sala di Parlamento i 12 tabata di forma virtual. Parlamento tin un total di 11 komishon fiho kual a reuní 33 biaha durante e periodo aki. Reunionnan di komishon fiho i bishitanan di trabou ta ménos kompará ku e añanan anterior debí na e situashon di Covid-19. Sra. Pauletta a indiká ku por parti e periodo tras di lomba den dos parti. E promé parti ta e periodo entre sèptèmber 2019 te ku febrüari 2020 , e di dos periodo ta despues di mart 2020 te ku awor aki (krísis i covid-19).

Temanan ku a resaltá durante e promé periodo ta: kresementu den área di turismo i su reto nan, seguridat (den tráfiko i kasnan di famia), transporte públiko, naturalesa i medio ambiente (p.e. desaroyo di Rif, piskadónan i sushedat di nos pais), UTS, Giro Bank , preparashon pa un enkuesta riba HNO i situashon finansiero en general. Temanan ku a resaltá durante e di dos periodo ta: situashon di covid-19 i e krísis ekonómiko, rekorte den
presupuesto di Parlamento, redukshon di kondishonnan laboral di parlamentarionan ku 25%, manifestashon di 24 yüni último, benta di PSB Bank, fondonan di SVB i Caribische Hervormingsentiteit.

Durante e periodo tras di lomba Parlamento a konosé dos Presidente di Parlamento despues ku nos kolega stimá eks Presidente di Parlamento sr. William Millerson a fayesé i sra. Pauletta a asumí presidensia di Parlamento dia 3 yüni 2020. Un situashon pekuliar ku a hala hopi atenshon ta e echo ku Parlamento a keda algun simannan den impase despues ku sra. Alcala- Walle a retirá sigui pa kambio den koalishon ora ku sr. Calmes a bira miembro independiente. Despues di esaki a hasi vários intento pa a logra pasa kredensial di sr. Elhage kual a bin sosodé despues ku Hues a duna sentensia pa a logra forma qourum den reunion di Parlamento yamá 11 ougùstùs atardi. Sr. Elhage a huramentá dia 12 ougùstùs último.

Hopi ta e proseso di leinan importante ku a kana den Parlamento durante e periodo aki. Manera entre otro: lei di deurwaarder, petroleumlandsverordening, lei di Cannabis Medisinal, presupuesto 2020, landsverordening uitzonderingstoestand, landsverordening rampenbestrijding i onteigeningsverordening, dierenwelzijn, partisipashon di Parlamento den trayekto di tratado Sofa den Tweede Kamer, prohibishon di plastic, independisashon di Konseho Supremo Elektoral i matrimonio di mesun sekso.

Aunke Covid-19 tabata tin su impakto positivo i ménos positivo riba funshonamentu di Parlamento, miembronan a sigui efektuá nan tareanan den forma adaptá. Pues por bisa ku eksepshon di e periodo ku tabata tin un impase promé ku yega na 21 miembro bèk, Parlamento no a stòp di funshoná. Kambionan ku Covid-19 a trese kuné pa ku funshonamentu di Parlamento ta por ehèmpel reunion di forma virtual, ménos reunion di komishon, ménos enkuentro ku gruponan den komunidat, simplifikashon di okashonnan solèm, manera dia di bandera i apertura di aña parlamentario i tambe debí na e situashon a redusí e temporada di reseso. Remarkabel ta un subida di partisipashon di miembronan di Parlamento durante di reunionnan i tambe asistensia mas largu awor ku reunionnan ta di forma virtual.

Pa finalisá sra. Pauletta a menshoná algun plan ku tin den “pipeline” pa e temporada binidero. Manera re-enforsa e protokòl di for 2013 pa ministernan kontesta preguntanan por eskrito di parlamentario den un tempu rasonabel, introdukshon di un “vragenhalfuur” ku lo por baha e kantidat di reunionnan ku ta keda pidi pa atendé temanan agudo, redusí e tempu entre petishon di reunion i e dia ku e reunion ta keda yama, terminá e struktura di grefi dor di introdukshon di un functieboek i introdushon di un kara nobo di Parlamento riba plataformanan digital.