Pueblo ta sinti cu tin cierto desaroyonan cu por considera negativo. Comercio ta sinti cu cos ta slow y nan ta kehando cu placa no ta draai. Rudy Geerman di FTA a splica cu pa loke ta horeca, e wiel ta draai hopi smooth, pasobra e ta bayendo bon pa nan. Conterario na comercio cual wiel ta sinti cu e ta manera stijf, e sindicalista a remarca.
Geerman ta sinti cu tur negoshi ta bisa cu e benta a baha. Claro cu e medida cu a wordo tuma ultimo, ta trece cun’e cu hende ta bay hiba cas menos placa. E balor di e poder di compra di e trahadonan ta bay atras. Apesar cu te awor aki, riba papel tin un costo di bida cu apenas ta subiendo, pero en realidad, si mira tur dia cu bo cumpra cos, y bo ta wak den e caso aki con e prijsnan ta.
Bo ta sinti cu tin un momento di ta cauteloso kico mas lo bay bin, segun Geerman. Cu esey lo por core te cu e luna aki completo, te otro luna. E ora ey pueblo por wak cu e medida aki tey, y riba dje, lo no bin ningun otro medida mas. E ora ey e pueblo ta haya confiansa bek y cu nan por den e caso aki, bin ta gastando locual cu ta e patronchi di gasta, den e ultimo luna of añanan. Un cos ta sigur, cu e poder di compra, e cantidad cu tabata tin pa gasta a bira menos.
Consecuencia
Comercio no ta depende di e area di turismo, pero di nos hendenan tambe. Geerman a comenta cu sea directa of indirectamente, mas cu 90% di entrada di e pais, ta depende di turismo. E comercio tambe directa of indirectamente tambe ta depende di turismo. E trahado ta traha pa turismo, turismo ta haya placa y cobra y ta bin gast’e. Locual cu a bin ta bisa cu, mirando cu e poder di compra a reduci, hopi hende no sa kico mas ta bay pasa, si tin un of otro medida mas. E ora ey nan ta riba un hold pa loke ta e gastamento. Esey ta hay’e den tur pais. E otro banda ta cu e economia ta crece poco poco. Esey ta trece cun’e cu tin un stagnacion. Una bes cu e lunanan ta pasando, cual Geerman ta kere cu despues di September of October, e ora ey bo ta bay wak cu e confiansa tey bek. Cu e ora ey e economia ta cuminsa fluctua su mes.
Inflacion
Geerman no sa dicon comercio ta teme pa inflacion. E inflacion pa añanan largo a wordo controla. Pero bo no por controla tur cos pa semper. Awo a yega e momento cu realmente bo no por controla mas. No lo kere cu e inflacion lo sali halto pa loke ta final di 2018, pero sigur e lo sali mas hopi cu final di 2017. Pero pa locual ta aña 2019 y 2020, eynan si por mira un gran influencia di locual ta inflacion. Claro cu e mester bin pasobra bo no por den e caso aki, si bo wak bon, con e inflacion tabata den e ultimo 4 pa 5 aña. Pero den e cartera di e trahado, bo no a nota esey, Geerman a splica.
