Awe mainta ex Minister di Husticia, ex Parlamentario y ex politico Rudy Croes tabata na Gabinete di Gobernador pa finalisa e procedimento di debolbe su condecoracion real cu el a ricibi den pasado como reconocemento pa su diferente funcionnan den sociedad di Aruba. Na su salida el a duna declaracion na 24ora.com riba e motibo tras di e bishita.
“E no ta un señal contra La Reina, ni contra Rey. Al contrario, mi ta stima nan, pero e ta contra e politiconan Hulandes,” Croes a bisa. E ta masha disgusta di e manera con nan ta tratando e paisnan den Caribe. “E hecho cu mi ta entregue ta como protesta; cu pa nos ta inaceptabel.”
Na su opinion, loke gobierno Hulandes ta haciendo ta buscando aworaki otro fuentenan di entrada. Pesety nan tabata kier Saba, St. Eustatius y Boneiro, y awor nan kier Aruba, Corsou y St. Maarten. Esey ta algo cu den pasado e no a permiti, y no lo bay hacie awo tampoco. “Tur e añanan prome mi tabata un di e prome linanan den e lucha, te hasta na margen di ley. Te cu Riot Commando a tira riba nos, tur e cosnan aki nos a pasa aden.”
Como Vice Presidente di COPPAL, Croes ta lobby pa e organisacion aki, cu Betico Croes a funda cu paisnan di norte, centro y suramerica, denuncia e intentonan di Hulanda na nivel mundial. Ademas di COPPAL, tambe ta cerando convenio cu ICAP y CAP pa defende autonomia di Aruba. “COPPAL ta denunciando esaki na Michelle Bachelet, President di e Commission di Derecho Humano awo cu Covid a come 84% di nos economia, bo ta tene saco di placa pa nos entrega nos autonomia y esey ta imposibel pa nos acept’e.”
Rudy Croes ta sinti cu e lucha ta pa tur e islanan, pero especialmente pa Aruba. “Tanten cu tin un tiki sanger den mi vena, tanten cu tin aire den mi pulmon, mi ta sigui te unda cu ta bringa contra abuso,” a bisa cu e tipo di abuso cu Hulanda ta purba haci ta sosode ora bo haya un military ta bira Secretario di Estado. E ta kere cu Aruba mester declar’e ‘Persona Non Grata’.
Tambe e ta buscando apoyo di su bon amigo y actual president di Surnam, kende ta miembro di CARICOM y Organisacion di Estadonan Americano pa denuncia di loke ta pasando na Aruba. Enfaticamente el a indica cu Parlamento tambe ta haciendo su esfuerso pa frena e tendencia criminal di e burdugunan aki contra nos pueblonan. “Mescos cu nan 1977 nan no por a pasa riba nos, wel nan no ta pasa riba nos nunca,” el a expresa.
“Nos no ta ria, nos no ta hala ningun un paso atras. Nos no ta hende cobarde, nos ta hende luchador pa e status unda nos tin nos bandera. Y ohala tur Aruibiano prepara boso bandera, paso cosnan ta bay pasa. E cos ey ta inaceptabel. Nos ta percura pa mundo haya sa con e practica aki ta. Mi ta pidi papa Dios drama su bendicion pa evita cu e hulandesnan aki por sigui y pasa riba nos pueblo. Esey mi ta pidi pasobra ‘The clock is ticking y e ta bay rapido. Nos no por acepta e cos aki.”