Rudolf Gibbs sospecha definitivamente tin un problema serio cu ambicion financiero y semper purba burla di nos sistema administrativo. E no tin limite, pasobra den pasado el a falsifica firma di Gobernador, di Minister, di Hues y di varios director di departamentonan di Gobierno. El a bay cera y awe atrobe e ta deteni, acusa di estafa y malversacion di riba mey miyon florin.
E caso penal di Gibbs na aña 2017 a hala hopi atencion. El a siña nos con vulnerabel departamentonan di Gobierno ta, con no profesional nan ta traha y con facil tabata mustra di falsifica un stempel of firma di un director di departamento. Despues di su hazaña, a adapta henter e forma di traha, a digitalisa y departamentonan a haya nan mes forsa pa traha mas uni y pa complementa henter e “vreemdelingenketen”. A castig’e y el a sinta su castigo di prizon parcialmente. El a bira malo y e tempo ey a convence Hues Comisario pa lag’e liber.
https://uitspraken.rechtspraak.nl/inziendocument?id=ECLI%3ANL%3AOGEAA%3A2017%3A590
Pero e no a siña di su erornan y ultimo luna el a bira e “Rey” di asilo politico. El a prepara un carta di peticion “standard” cu e ta cobra cada cliente Afl. 1500,00 pa mande pa DIMAS pidiendo Asilo Politico. Ta conta cu el a estafa mas di 300 hende asina, cobrando nan hunto riba mey miyon florin. Ora a declar’e “non grata” na DIMAS, el a cuminsa manda su peticionnan via carta. Ora no ta tuma nan mas, el a cuminsa uza un otro compania.
Dor di manipula stranheronan den necesidad, d ta cobra nan y haci comosifuera cu e si por logra haya asilo politico pa nan. Ora el a domina e mercado asina bon, e prijs a subi pa Afl. 3000,00 den sentido cu e ta cobra e compania Afl. 1500.00 pa regla un trahado cu permiso pe y ta cobra e stranhero Afl. 1500,00 pa e haya asilo politico pe y garantis’e un trabou mesora.
E wega ta cu mientras e stranhero tin status di “wardando contesta riba peticion di Asilo Politico”, nan por keda Aruba y traha sin problema. Dor di falta di personal na DIMAS y contando cu lo apela e decision ora nenga, e ta “bende” e stranheronan cu e trayecto aki lo por yuda nan keda mas o menos 1 aña y mey na Aruba “sin problema”. E no a conta cu DIMAS tin un ekipo nobo trahando exclusivamente riba e peticionnan aki y cu ta contestando tur hende mesora.
Rudolf Gibbs ta un ex Polis y ta presenta su mes como hurista of abogado riba tereno di permiso di estadia y trabou na Aruba. Sinembargo, dor di su hazaña di falsificacion y estafa cometi dos aña pasa, e no tin acceso na casi ningun instancia di Gobierno. Cu e caso penal awor den su contra, e lo mester cuminsa na sinta e castigo “condicional” cu ta colga riba su cabes pasobra el a bolbe comete e mesun tipo di delito, di cual el a ricibi un condena recientemente di Hues.
