Un biaha mas e masahista Rudi Carti tabata e siman aki na warda di polis pa interogacion.
Esaki tabata basa cu despues cu e tabatin mas cu un luna deteni, a bini informacion nobo pero tambe denuncia nobo contra Carti pa cual a dicidi di trece warda. Aki Recherchenan pa algun ora a hacie pregunta riba tur loke e denunciante nobo a bisa contra dje.
Den oranan laat di merdia pa atardi, a sali cu ne di e salida patras di warda di polis y a transport’e pa KIA unda e ta cera.
Tabata riba diabierna, 12 di februari, cu hues comisario a bay di acuerdo cu e peticion di fiscal pa prolonga detencion di Rudi Carti cu 60 dia mas. Esaki ta nifica cu den e prome siman di april e lo mester ta un biaha mas dilanti hues comisario, a menos cu haya cu no tin motibo pa want’e cera mas y lague liber. Aunke conocedonan di e materia no ta kere cu esaki lo sosode.
Den casonan di inmoralidad den su mayoria e sospechosonan ta keda cera te ora cu e caso yega dilanti mesa berde.
Acusacion: Masahista maniak
E damanan cu a presenta na recherche a describi un scenario di cual mayoria tabata similar na otro. Esey ta mustra cu e masahista tin un “modus operandi” cu entretanto a bira conoci bou di su clientenan. E ta bisti su pechi di masahista pa por sacia su sed maniak, pa cual awor a hinc’e den un problema serio cu husticia. Es mas, tin di e victimanan ta raporta cu ta for di basta aña pasa caba e casonan aki a tuma luga, mientras cu otronan ta casonan bastante recien. Pero tur ta bay bek na un acto inmoral, cu no ta permisibel pa ley y ta condenabel penalmente pasobra ta atacha e integridad di curpa di e ser femenino. Ta papia aki di mishi cu un persona (den e caso aki uncliente) di un forma cu no ta normal. Esta cu el a bay mas leu cu solamente duna masahe.
Mas cu djis inmoralidad
Desde diabierna 15 di januari a detene Carti y a encarcel’e pendiente un investigacion andando relaciona cu un acusacion contra dje di inmoralidad. Locual ta conoci te ainda ta cu recherchenan di Jeugd en Zeden Politie (JZP) e yega su cas na Mahuma mas di un luna pasa y a bay cu ne riba ordo di Fiscal. Mientras cu e intencion tabata pa investig’e pa inmoralidad, a resulta cu a topa cu un otro misterio. Parce cu durante e “inval” di polis, ora cu a busca pa yega na material di prueba den su cas, cu alabes ta su negoshi tambe unda e ta duna masashi, a bin topa cu mas cu djis posibel prueba di e acusacion. A bin descubri cu Rudy Carti tabatin un suma grandi di placa efectivo den su cas. Ministerio Publico no a divulga ainda si ta trata aki di florin of dollars Mericano. Un cos si nan a confirma, e cantidad di placa efectivo ta mucho mas cu normal y como tal a lanta sospecho cu mester tin algo mas tumando luga den e cas y negoshi aki.
