Rubiano riba lista di partido CDA na Hulanda

E hoben procedente for di Aruba, Mandy Villasmil, ta entre e top 10 candidatonan riba lista di e partido Christen-Democratisch Appèl, miho conoci como partido CDA na Hulanda. Ta e mesun partido di e secretario di estado Raymond Knops, cu ta atendiendo asuntonan di Aruba y henter Caribe Hulandes e ultimo añanan. E Rubiano a opta pa subi e lista pa eleccion di gemeenteraad den cual e ta riba e lista specifico pa e ciudad Den Haag, cu ta precisamente unda gobernacion di Madre Patria ta situa. E eleccion ta tuma luga dia 16 di maart 2022 y Villasmil a haya #8 riba e lista color berde.

Mandy Villasmil a yega shete aña pasa na Den Haag pa e studia como dokter. Entretanto el a siña conoce Den Haag bon. El a biba con ta sinti como studiante nobo for di Caribe Hulandes pa yega Den Haag, cu tur e retonan cu e ta trece cu ne.

Mandy Villasmil ta yiu muhe di Armando Villasmil jr. y Luanne Eman. E ta comprometi cu Kanaan Baroud. El a caba VWO na Colegio Arubano na aña 2013 y ta studiando medicina desde 2014 na Universidad di Leiden, na Hulanda.

Partido CDA di otro banda ta masha contento cu Mandy Villasmil ta dispuesto pa pone su mes disponibel pa representa e grupo di studiante den gemeenteraad na Den Haag. Tambe cu su conocemento riba tereno di cuido medico, cu el a gana danki na su estudio y stagenan, e ta bonbini den conseho municipal. Pa mas informacion, lesa e edicion di TREMPAN di awe.