Un hoben hopi stima entre su amigonan piscado a fayece. Bryon Richardson, cu un carera asina bunita den piscamento y tiramento di pisca, a dal cu brommer y a muri mesora. Bryon Richardson algun luna pasa a bay Dubai. El a bay traha p’e Sheiknan cu ta gusta bay tira pisca. Diferente tirado di pisca di Aruba a haci nan carera cuidando e Sheiknan y nan yiunan ora di bay tira pisca.
Bryon Richardson tambe a haya e oportunidad aki y tin algun luna caba trahando. Parce e tabata falta dos luna pa bolbe Aruba. Algun dia pasa el a cumpra un brommer tipo Sportbike. E tata mes no a aprecia masha e compra di e brommer. A pidi su yiu Bryon pa miho deshaci di e brommer.
Plons Richardson ta tata di Bryon y hunto nan tabata sali pisca riba e boto Moonray. Bryon Richardson tabata e man drechi di e tata. El a haya un oferta y a bay traha na Dubai pa un temporada. Diabierna merdia el a sali cu brommer di un otro amigo. Su brommer mes tabata para. El a bay core cu velocidad halto. Segun e tata, e tabata core como 220 y hasta a graba e velocidad cu e tabata coriendo. Despues di un of otro forma el a dal cu e brommer y muri mesora.
Famia a haya e yamada di e caso tragico cu a pasa den ora di diabierna merdia di Aruba. Un sla hopi fuerte pa henter e famia. Awo ta bay cuminsa e preparacion pa mira con lo trece e restonan bek Aruba. Cu e morto tragico di Bryon, Aruba ta perde un gran amigo piscado y tirado di pisca. Cu Bryon Richardson su alma descansa. Forsa na su tata Plons Richardson, su mama Ica Jones, e ruman homber Kyle y demas famia.
