Royal Power Tat Fat Home Depot ta seya un otro victoria derotando Kudawecha Indians

Torneo Copa Noord 2019 a continua diadomingo ultimo riba veld di Kudawecha. Riba un fecha hopi particular celebrando dia di mama e equipo di Royal Power Tat Fat Home Depot a mobilisa su hungadornan pa bay tereno pa cumpli cu nan obligacion.

Den oranan di merdia Royal Power a enfrenta e donjonan di tereno esta Kudawecha Indians. Den e final di Copa Noord 2018 tabata ultimo biaha cu e dos equiponan aki a enfrenta otro den e gran final di Copa Noord 2018 unda Royal Power a derota Kudawecha Indians mediante knock out pa titula campeon 2018. Pues tabata un momento oportuno pa e revancha den Copa Noord 2019. Kudawecha ta pone precion desde promer inning y ta rally pa 2 careda.

Den di dos inning Royal Power ta rally amplio pa 8 careda y ta amplia esaki cu 5 mas den di tercer entrada. Kudawecha Indians sinembargo no a baha cabez y ta rally bek den di 4 inning pa 6 careda pa trese e wega serca 13-8. Giannini Tromp kende ta drenta releva Melchor Abrue ta silincia Royal Power por completo tirando 3 inning blanco sin permiti un careda. Royal Power ta logra su di tercer victoria den Copa Noord 2019. Royal Power 13 careda, 15 hit, 0 error. Kudawecha Indians 8 careda, 15 hit, 4 error. Pues un wega bastante balansa. Alvaro Barrios Romero ta piki su di dos victoria den un weekend mientras Melchor Abrue ta bay cas cu e derota.

Mihor bateadornan pa Royal Power a resulta Edmar Tromp,Giandrick Lacle, Kelvin Silvania tur a bay di 4-2, Gregory Pilin Krosendijk di 5-2, Estefano “Fano” Croes di 2-2, Kenny Hart 2-1. Pa Kudawecha Indians a destaca na plato Deyon Peterson, Ozzi Webb, Gerald Werleman tur di 4-3, Joward Croes y Edmar “Echi” Boekhoudt di 4-2. Diasabra awor Royal Power tin un otro compromiso den Copa Noord 2019 momento cu Royal Power lo ta enfrentando e muchanan di Bad Boys. Royal Power lo purba amplia pa 4 victoria mientras Bad Boys tambe ta enbuska di un victoria. Manera nan ta bisa e bala ta rondo y esun cu hunga mihor e dia ey lo gana. Exito na ambos. Playball!!!!

????????????????????????????????????