Campeonato HEINEKEN fast pitch di Aruba Softball Bond dedica na dos baluarte Jacobo Jansen y Gilbert “Nando” Maduro a continua na Pos Chiquito. E dos rivalnan Royal Power Tat Fat Home Depot y Jay’s Tire a topa otro den gran forma. Jay’s Tire na un milimetro pa kibra invicto di e muchanan di Royal Power e storia a bolter momento Gregory “Pilin” Krosendijk ta conecta un homerun insite the park cu basenan yen den bom di 5 inning perdiendo 4-1 te na e haltura ey di wega y asina bolter e score 5-4 na fabor di Royal Power.
Jair ta sera e siguiente inning a paso de conga pa seya e victoria riba su nomber. Jay’s Tire ta pika ariba 4-0 den cabez di promer inning. Royal Power ta anota 1 careda den bom di 3 inning pa corta ventaha 4-1 te momento e grandslam a bini pa bolter e wega. Royal Power 5 careda, 6 hit, 2 error y ta laga 3 coredor na base.
Jay’s Tire 4 careda, 2 hit, 0 error y tambe ta laga 3 coredor na base. Mihor bateadornan pa Royal Power ta Gregory “Pilin” Krosendijk di 3-2 cu un grandslam inside the park mas 4 rbi, Edmar “Macho” Tromp y Luis Pelayo ambos di 2-1, Leander Angela y Aigil Brete di 1-1. Pa Jay’s Tire a luci na plato batiendo e unico dos hitnan pa nan equipo Nathan Berkel 2-1 y Djurwin Croes di 1-1.
Jair Thompson aunke a cuminsa hopi wild y a regala 6 base por bola a sa di recupera tirando 42 bola, 61 strike pa un total di 103 lansamento enfrentando 22 bateador permitiendo 4 careda di cual 3 ta limpi tras di 2 hit y ta poncho un total di 6 bateador garantisando e victoria riba su nomber. Gianmar Alders a bay 3 inning y 2 tercio tirando 28 bola, 31 strike pa un total di 59 lansamento permitiendo 3 careda, 5 hit y ta regala 2 base por bola y tin un no decision riba su nomber. Jorge Santana Cortina ta releva 1 inning y ta bay cas cu e derota riba su nomber. Dialuna awor weganan ta continua na Pos Chiquito.
