Royal Power Tat Fat Home Depot ta derota Celebrities den un gran partido  

Campeonato Heineken fast pitch di Aruba Softball Bond dedica na dos baluarte Jacobo Jansen y Golbert “Nando” Maduro a continua riba veldnan na Pos Chiquito. Den categoria AA equipo di Royal Power Tat Fat Home Depot ta derota Celebrities den un gran partido 7-2. Celebrities ta pika bay ariba den cabez di promer inning 1-0 pero den bom di Segundo inning Royal Power ta rally y ta bounce bek cu 4 careda.

Celebrities ta anota un mas den tercer inning pa trese e score mas serca esta 4-2. Finalmente den bom di 4 inning Royal Power ta piki 2 caredamas y garantisa cu un careda den bom di 5 inning pa asina gana cu e score di 7-2. Boxscore final pa Royal Power  7 careda, 11 hit, 0 error y ta laga 6 coredor na base.

Celebrities 2 careda, 7 hit, 0 error y ta laga 5 coredor den circulacion. Royal Power a bati como equipo di 24-11 pa un averahe di 485 mientras Celebrities a bay di 21-7 pa un averahe di 333 como equipo. Mihor bateadornan pa Royal Power a resulta Edmar “Macho” Tromp di 3-2 cu un careda anota mas 4 impuha incluyendo un triple y un doblete, Jomark Flanegin y Guyon Cannister ambos tambe di 3-2, Kenny Hart di 2-1, Giandrick Lacle di 2-2, Jair Thompson y Jeandrick Croes a bay di 1-1.

Pa Celebrities a luci na plato den causa perdi Ruwin Tromp 3-1, Wensley Kock y Ozzi Webb di 2-1, Joshua Wever 3-2 y Gregory Manuel di 2-2. Kelvin Silvania ta bay 3 inning enfrentando 14 bateador, 20 bola, 35 strike pa un total di 55 pitch, permitiendo dos careda riba 5 hit y no ta regala base por bola pa pone e victoria riba su nomber. Jair Thomspon ta drenta releva Kelvin Silvania y ta bay 3 inning  enfrentando 11 bateador tirando 18 bola, 27 strike pa un total di 45 pitch, no ta permiti careda regalando solamente 1 base por bola y ta “huma” 5 bateador, Wensley Kock, Rudolf “Rudy” Angela, Angelo Dos Santos y Albertico Noguera cu 2 strike outs pa asina pone wega salba riba su nomber.

Jeremy Geerman di Celebrities a enfrenta 28 bateador lansando 37 bola, 42 strike pa un total di 79 pitch, permitiendo 7 careda tras di 11 hit y ta regala 4 base por bola poniendo asina e derota riba su nomber. Weganan ta continua dialuna, diaranson, diabierna riba veldnan na Pos Chiquito y diamars y diahuebs na Dragon Hitters cu un bar y cushina bon surti! Waak pa bo tey!!