Rotary Walking Dinner pa ekipo mamografia nobo pa Fundashon Prevenshon

Pictures by © Berber van Beek https://www.facebook.com/studiorootzphotography/ or www.studiorootz.com

Rotary Clubs Curaçao i Willemstad, huntu ku Rotary International, Orco Bank i otro patrosinador a uni forsa pa rekoudá fondo pa un aparato nobo di mamografia pa Fundashon Prevenshon (FP). Djamars dia 8 di mei awor Rotary Walking Dinner ta e evento pa ekselensia pa kolektá fondo pa e bon kousa aki.

Fundashon Prevenshon
Mundialmente 1 di kada 8 ta haña kanser na pechu. For di 2010 tur hende muhé (entre 45 i 75 aña) na Kòrsou ta haña un invitashon pa partisipá na e investigashon di kanser na pechu bou di poblashon. Fundashon Prevenshon ta hasi esaki. Na 2016 ya 20.990 hende muhé a haña un invitashon na un di e sitionan di FP pa laga hasi un mamografia. Na total 8631 hende muhé realmente a duna oido na e invitashon.

For di 2010 FP ta saminá pechu pa kanser ku un aparato di mamografia ku mientrastantu nan mester remplasá. Onkólogo i profesor emérito di VU Bob Pinedo (74), un di e spesialistanan di kanser mas atmirá rònt mundu, ta èks-presidente di e fundashon i hopi kontentu ku e inisiativa di e klupnan di Rotary pa logra remplasá e mamografia.

Spar riba kuido
A lanta Fundashon Prevenshon for di e punto di salida ku prevenshon ta promové i protehá salú. Segun e Ministerio Hulandes di Salú Públiko i Bienestar, tin indikashon kla ku por spar gastunan di kuido si detektá malesa i komplikashonnan den un fase mas tempran posibel. Esaki señora Louise Elstak, direktor di FP, ta enfatisá, esta ‘ku paisnan ku ta praktiká prevenshon, ta spar plaka riba kuido. Ku un diagnósis tempran bo ta evitá ku hende ta bira malu òf hasta ku nan ta muri”.

Rotary Walking Dinner
Djamars dia 8 di mei awor pa di kuater biaha tin e Rotary Walking Dinner na Pietermaai. Sinku (5) kurso na 5 diferente sitio! Na komienso na e plenchi Octagon di Avila, lo tin un podio pa Fundashon Prevenshon, fondo Prinsesa Wilhelmina (PWF), spònser prinsipal Orco Bank i e Rotary Clubs. Mas ku klaro ku tin tambe un palabra di gradisimentu pa e partisipantenan na e Rotary Walking Dinner.
Mèldu awe mes pa e rekoudashon kulinario di fondo via [email protected]. E loke ta generá e anochi ei pa gran parti ta bai pa Fundashon Prevenshon destiná pa kumpra ekipo nobo di mamografia.