Dialuna mainta District Governor Dominique Venere a yega Aruba. Dominique ta di Guadeloupe y ta e Governor di e Districto 7030 di Rotary International pa e aña aki.
Aruba y hermana islanan Curacao y Boneiro ta forma parti di e Districto aki desde 1 di januari 2017. Tur aña e District Governor ta bishita tur e islanan na unda tin un Rotary Club pa asina conoce e miembronan di e club, e communidad y e proyectonan cu ta wordo ehecuta. E District Governor tabata compaña pa e Assistant Governor Rita Merkies di Rotary Club of Willemstad. Rita ta fungi como e link entre e islanan ABC y e districto di Rotary International. E aña aki e District Rotaract Representative (DRR) Delon Earle hunto cu Assistant DRR pa islanan ABC, Stephanie Boekhouwer tambe a forma parti di e bishita oficial aki.
E bishita official a cuminsa na Club Kibrahacha 60+. Na aña 1985 bao di guia di miembro honorario, sr. Eric D’Arnault, Rotary Club of Aruba a funda esaki. Awe en dia, 33 aña despues, Club Kibrahacha 60+ a crece den un centro cu miembronan activo. E District Governor a haña un presentacion di sra. Angie Amidjojo y un rondleiding di sr. Jeffrey Matos di e lugar.
E bishita a sigui na Y.M.C.A Dakota. Otro organisacion cu a wordo funda pa Rotary Club of Aruba y pa añas ta ricibi donacion y sosten di entre otro Rotary Club of Aruba. E Secretario General nobo di Y.M.C.A. Rhomyko Winklaar y Orlando Hoevertsz a elabora ariba e organisacion y actividadnan di Y.M.C.A.
Anochi durante e reunion semanal di Rotary Club of Aruba e District Governor a haya oportunidad pa topa cu otro miembronan di Rotary. Miembronan di Rotaract y Interact tambe tabata presente na e reunion special aki. District Governor a keda masha impresiona cu e proyecto y actividad nan di Rotary Club of Aruba, Rotaract Club of Aruba y Interact Club of Aruba. E la gradici tur miembro pa nan aporte na e communidad di Aruba. District Governor y Assistant Governor lo sigui nan bishita pa Boneiro y despues pa Curacao pa bishita e clubnan di e parti aki di Caribe.
Presidente di Rotary Club of Aruba Edsel Lopez ta sigur hopi contento cu e bishita importante aki. Edsel kier gradici tur miembro di Rotary Club of Aruba un biaha mas pa nan trabao boluntario cu nan ta hasi pa e club y Aruba. Esaki ta inclui e miembronan di Interact Club of Aruba y Rotaract Club of Aruba.
