Den fin di siman tabatin e evento di Miss Plus Aruba y e ganado tabata Rosandy Geerman. E certamen a conta cu participacion di diescuater persona, aunke cu el a cuminsa na diescinco pero un di nan a cay afo.
Di un idea a bin cu e certamen aki, pasobra nunca tabatin un certamen di plus size pa hende muhe. Tyrone Farro, organisado y presidente di Miss Plus Aruba, a bisa cu nan a bin cu e cambio y cu ta admira e comunidad di plus size, esnan cu tin durf y di tin nan mesun confiansa. No tabata dificil pa handle. E ta kere cu ora di hinca tempo den cada participante individual na luga di un grupo, e ta bay mas facil.
E prome reto tabata introduccion di candidatonan, despues tabatin e Good morning challenge, cual tabata dos reto di potret. Tambe tabatin video, badpak, gala, cover di revista y tambe tabatin reto di I want to make a difference. Esaki tabata un verslag y mester a pone kico nan kier haci tocante un problema den sociedad cu nan por haci cambio.
Rosandy Geerman tin 22 aña y a participa den e evento di Miss Plus Aruba. El a gana e titulo maximo di Miss Plus Aruba 2020, pero el a motiva su mes pa participa den e evento. Geerman a haci esey pasobra e kier trece cambionan dilanti pa tur ser femenino cu curpa pa tambe participa den un certamen di beyesa.
El a expresa cu normalmente hende flaco ta participa, pero esaki ta prome biaha cu na Aruba ta bin un certamen pa hende muhe cu curpa. Pa su persona cada reto tabata un experencia nobo, tabata dibertido. E no a sinti cu esaki tabata un competencia, pasobra cada uno tabata stimula otro. Geerman ta motiva otro sernan femenino cu curpa pa tambe participa otro aña y bin cu nan mesun cambio. Esaki ta pa demostra cu nan, como hende muhe, tambe por demostra nan talento como bunitesa di paden y pafo.
