Ronald van Raak: Hulanda semper lo sigui yuda e islanan den Caribe

1437

“Como representantenan di pueblo, ora nos subi caya aki na Hulanda y puntra ciudadanonan si nos mester sigui inverti decenas di miyon di Euro na Aruba, Corsou y Sint Maarten….nos tur sa kico e contesta lo ta, pero toch nos ta haci’e”, asina Ronald van Raak, miembro di e Fraccion di Socialistische Partij (SP) den Parlamento di Hulanda, a bisa ayera. Esaki durante e reunion den Tweede Kamer relaciona cu extra sosten financiero na Aruba, Corsou y Sint Maarten relaciona cu e crisis di Coronavirus y su impacto na nos economia.

El a bisa di por papia den nomber di henter Parlamento Hulandes, cu na final semper ta bou presion di e votadonan Hulandes pero toch semper ta sigui sostene tur e islanan cu ta forma parti di Reino Hulandes. “Pero asina mes nos ta haci’e; esey ta e sentimento di ta parti di un Reino. Pero nos ta pone un exigencia, na Boso interes. Cu e placa ta yega cerca e pueblo. E placa ta pa e pobernan di Aruba, Corsou y Sint Maarten cu mester di dje. Y no pa e grupo elite chikito cu pa añanan largo a enrikise nan mes riba Boso lomba. Demasiado hende a bira rico danki na boso pobresa. Esey ta loke cu nos kier evita. Nos ta para na Boso banda, p’esey nos di Tweede Kamer completo ta pone e condicionnan,” asina e Parlamentario a bisa den su disertacion.

Ronald van Raak (SP): Parlamento di Hulanda semper lo sigui sostene e islanan den Caribe Hulandes

Ronald van Raak (SP): Parlamento di Hulanda semper lo sigui sostene e islanan den Caribe Hulandes

Posted by 24ora on Friday, May 22, 2020

Na mesun momento el a bisa cu Aruba a bay di acuerdo, pero no a haya contesta e momento ey ni di Corsou di Sint Maarten. El a bisa tambe cu si e paisnan ey no acepta e condicionnan, “nos lo haya otro forma pa yuda nos rumannan den Reino, kisas nos lo pasa rond di e politiconan y ta cla. E contesta cu nos ta spera riba e condicionnan ta un Si of No.”

Andre Bosman (VVD) hunto cu Ronald van Raak (SP), dos Parlamentario Hulandes cu ta dedica hopi atencion na relacionnan den Reino, specificamente pa Aruba, Corsou y Sint Maarten.

Antonius Adrianus Gerardus Maria (Ronald) van Raak ta naci dia 30 di october 1969 na Hilvarenbeek, na Hulanda. El a caba HAVO y VWO, pa despues continua cu y a caba su estudio di  maatschappijgeschiedenis y filosofia na Erasmus Universiteit na Rotterdam. El a promove na aña 2000 na Universidad di Amsterdam cu su tesis riba conservatismo. Su siguiente aña el a bisa docente na e mesun universidad ey y pa algun aña a traha como redactor di e revista Geschiedenis van de wijsbegeerte in Nederland. Na aña 2003 ela bira miembro di Eerste Kamer pa e partido SP. Na aña 2006 el a drenta Tweede Kamer y desde e tempo ey a conta cu votonan preferencial den eleccionnan na aña 2010, 2012 y 2017.