Lider di fraccion di MEP, Rocco Tjon, a comenta cu a trece hopi punto al caso no solamente pa e fraccionnan di coalicion, pero tambe pa oposicion, durante e tanda largo aki.
Ta trata aki di un topico cu a causa e dialogo den comunidad. Un paar di punto sigur cu a purba di trece dilanti, cu no ta trata aki di ningun ley caminda cu ta bay garantisa existencia di Serlimar.
Pais Aruba semper lo tin cu carga su responsabilidad pa loke ta existencia di Serlimar y semper a bin ta haci esaki tambe.
Pero na mes momento no ta trata di un ley pa kibra un compania priva tampoco. Segun Tjon tin diferente punto treci p’adilanti den un amienda, pero tambe den un nota di cambio, caminda no ta papia di exclusividad. E palabranan cu lo por insinua esaki ta wordo kita afo tambe pa evita tur malcomprondemento cu por tin.
Pero na mes momento tambe loke a trece p’adilanti cu bao di ningun circunstancia ta trata di un ley di incinerator. Esey tambe a trece padilanti cu tin diferente proceso encaminando. Procesonan cu a cuminsa mas cu un aña atras, caminda e meta final ta pa yega na e miho solucion pa maneho di desperdicio na pais Aruba.
Tin un caminda den e ley ta skirbi “als enige belast”. Esey ta un parti cu apesar cu e minister a indica esey, sigur esey no ta intencion. A kita e parti aki toch pa evita mal comprondemento. Na mes momento a bin un otro reparticion pa loke ta e tarifa di recoge sushi y maneha sushi. Un tarifa cu ta bay garantisa un level plainfield pa tur compania cu di un manera of otro, ta eherce nan tareanan pa loke ta desperdicio na Aruba. Asina por yega na un producto final mas balansa y mucho mas miho na final di dia pa full pais.
Awe no a trata ley di incinerator. Pa mas cu un aña caba tin un proceso cu ta encamena pa gobierno di Aruba, caminda cu gobierno a cuminsa cu e proceso di un RFI (Request for Information), caminda cu 27 compania internacional a splica kico den nan concepto ta e miho solucion pa maneho di desperdicio.
Esaki ta un proceso cu a encamina caminda tur compania por a indica no solamente pa loke ta e tres conceptonan pa loke ta Waste-to-energy, esta gasificacion y incineration entre otro, pero tambe si nan tin un otro solucion nan por a trece esaki padilanti tambe.
E proceso ey a wordo encamina. Te cu ainda no tin ningun decision. Esey tambe ta loke e minister a trece p’adilanti. Ta importante pa señala esaki pasobra na fin di dia no tin ningun decision tuma. No ta conoci ainda ki gasto lo tin mara na un proyecto asina.
Un cos semper a bin ta vocifera y a keda riba e punto di bista ey, cu no obstante ki solucion scoge, esaki mester keda semper dentro di e margennan pa loke ta nos situacion financiero di finansas publico na Aruba.
Segun Tjon, un cos cu sigur no ta preocup’e pa loke ta full e topico aki, ta gastonan cu por tin mara na un proyecto.
Dicon ta bisa esey
Realidad ta cu na 2020 ta bay tin un surplus pa loke ta presupuesto di pais Aruba y ta bin for di deficitnan di mas cu 200 miyon pa aña. Un cos sigur cu Tjon tin confiansa pa loke ta e maneho di gabinete Wever-Croes ta cu nan ta maneha finansas publico na un manera hopi serio. E aspecto ey sigur no ta preocupa fraccion di MEP.
