“Nos ta satisfecho con a aproba e ley di LAft”, esaki tabata e prome palabranan di lider di fraccion di MEP, Rocco Tjon riba e concepto di ley LAft aproba diahuebs anochi den Parlamento. Durante e reunion aki e fraccion geel a entrega un amienda cu ta contene tur e sugerencianan di Raad van Advies y di Raad van State pa na final tin un bon Ley di LAft (Landsverorderning Aruba Financieel Toezicht), regla segun e deseo di Aruba.
Hasta e fraccion di MEP, a haci uzo di e experticionan di dr. Rycond do Nascimento, kende ta forma parti di e think-tank di AVP. “Nos a haci uzo di tur e sugerencia, di 2015 te cu awo, pa evita cu LAft ta bay en pugna cu constitucion di Aruba,” Tjon a splica.
El a enfatisa cu nan no ta pensa diferente cu Gobierno, pasobra nan fraccion tambe kier yega na un finansa publico solido. Gobierno a firma un protocol cu ta basa riba e Memorandum Financiero Economico traha door di Gobierno y cual a wordo aproba door di Parlamento.
Esey a sosode for di tempo cu a aproba Presupuesto 2018 y a conta cu apoyo di CAft y Gobierno di Reino. “Nos ta traha riba e mesun liña, numa Gobierno ta ancra nan pensamentonan den un Protocol y Parlamento den un ley.” E unico aspecto cu no ta atende di e mesun forma ta e normanan, cu excepcion di e norma financiero. Tur e otro normanan menciona den e Memorandum Financiero Economico y Protocol no tin un base legal.
“E motibo pa esaki ta simpel. Maneho por cambia cu cada Gobierno y esaki ta algo cu mester keda na decision di Gobierno, por ehempel si ta tuma mas personal of no; con ta uza e fondonan y pakico, etc. CAft por sigui duna su consehonan pero no por tuma e decisionnan,” Tjon a bisa den su declaracion.
E situacion di tempo cu Eman a bay den welga di hamber contra Hulanda no ta diferente. Eman, e ta bisa, a bay den welga di hamber pasobra e no tabata di acuerdo cu e forma con Hulanda kier a interveni. “Pero riba e motibo nos no tin discusion.” El a corda cu Raad van State mes a bisa cu Hulanda mester a interveni haciendo uzo di otro hermentnan, no via e reglamento di Gobernador pero via di Statuut (articulo 51). E preocupacionnan di Hulanda e tempo ey tabata valido, pasobra e presupuesto no tabata realistico.
Fraccion di MEP aworaki a sigui conseho di e instancianan concerni y Hulanda no por otro cu acepta e Ley di LAft manera el a wordo aproba cu e amiendanan. Hulanda semper tin otro instrumentonan pa kisas desvia di e ley aki, pero Tjon no ta spera cu esey lo sosode.
Tocante CAft
E trabounan di College Aruba Financieel Toezicht (CAft) a bin despues di un acuerdo cera den e protocol entre Hulanda y Aruba di dia 2 di mei 2015, e asina yama “witte donderdag-akkoord”. E trabou di supervision a haya su poder dor di un ley, yama Landsverordening Aruba tijdelijk financieel toezicht (LAft). E ley aki ta stipula cu un bes na mita di aña, CAft ta traha un rapport riba su trabounan y ta entreg’e na Conseho di Minister di Aruba, Parlamento di Aruba, Gobierno di Reino Hulandes y ta Tweede / Eerste Kamer di Parlamento na Hulanda.