Rocco Tjon (MEP): No lo acepta condicionnan di Hulanda

“E proceder di Hulanda ta inaceptabel y por wordo considera un acto contra derechonan humano. Un crisis mundial ta wordo maluza pa cambia structura estatal di un pueblo liber. E entidad nobo y e supervision financiero lo wordo opera y dirigi door di Hulanda. Pero esaki cu fondonan di e pueblo Arubano. Y esaki nos no lo acepta”, asina Rocco Tjon, lider di Fraccion di MEP den Parlamento a vocifera awe. E ta referi na e decision cu lo cay diabierna awo den Conseho di Minister di Reino na Den Haag, Hulanda.

MANEHO FINANCIERO DI CAFT Y RMR 2009 – 2017

Segun Statuut, articulo 43, ta deber di Hulanda pa “waarborg” entre otro finansas saludabel di e paisnan Caribense di Reino. Bou nan propio supervision nan a permiti Mike Eman pa masacra nos finansas publico y perhudica futuro di nos pueblo. Pues Hulanda, Gobierno di Reino y e Colegio di Supervision ta co-responsabel pa e situacion cu nos ta aden aworaki. Pasobra realidad ta cu te cu 2009 Gabinete Nelson Orlando Oduber a laga un debe nacional atras di 43%, segun Rocco Tjon di MEP.

POLITICA DI KNOPS Y HULANDA

E yudansa cu Hulanda ta duna awor aki no ta costa Hulanda niun florin. E pueblo Arubiano lo paga esaki bek. Den prensa na Hulanda, Knops a haya hopi critica pa e condicionnan cu nan ta impone riba e islanan Caribense. Mas aun mirando cu nan ta yuda diferente pais pafor di Reino, cu hopi placa sin impone ningun tipo di condicion. Y aworaki Knops kier manipula den medionan di comunicacion pa haci comosifuera cu nan no a impone condicionnan riba e pueblonan Caribense.

MANEHO FINANCIERO DI GABINETE EVELYN WEVER CROES

Di un deficit pa un surplus den apenas dos aña. Na 2014 pais Aruba tawata conoce un deficit di 444 miyon florin. Esaki ta e mes momento cu liderazgo di Mike Eman a conduci cu Aruba a haya un Koninklijk Besluit (KB) pa mal gobernacion. Na 2017 pais Aruba tawata conoce ainda un deficit di 130 miyon florin, herencia di AVP. Liderazgo di mr. Evelyn Wever-Croes y mr. Xiomara Maduro a transforma e deficitnan astronomico aki den un surplus despues di solamente 2 aña di gobernacion.

PA CONCLUI

E palabra “consensus” ta nifica cu tur dos partido mester bay di acuerdo cu locual ta wordo propone. Hamas por wordo considera cu por papia di “consensus” pa loke ta trata e dos “rijkswetnan” aki. Hulanda, bou menasa di no duna Aruba fiansa kier pa aworaki bay di acuerdo cu cambionan estatal pa un yudansa cual segun nos Statuut Hulanda ta obliga di duna.

Locual ta mas condenabel ainda ta cu Hulanda ta menasa pa laga nos pueblo muri hamber pa asina por logra dos cambio den nos structura estatal. Y esaki ta bay contra e derecho di autodeterminacion di un pueblo liber.