IPKO (Interparlementair Koninkrijksoverleg) a cuminsa na Hulanda entre 29 di mei pa 1 di juni, e paisnan den Reino ta reuni riba diferente topico importante cu ta toca cada pais den Reino. Meta di e reunionnan aki ta pa como Parlamentonan den Reino fiha un posicion y posiblemente yega na soluccionnan efectivo pa retonan comun. Rocco Tjon, lider di Fraccion di MEP y vocero pa e delegacion di Aruba, a elabora awe mainta den e reunion na Hulanda riba e recien desaroyonan.
Rocco Tjon durante su discurso a splica cu e desaroyonan relevante pa Aruba aworaki den relacion cu Reino ta encera supervision financiero, desaroyonan actual di e situacion cu Venezuela y e “Geschillenregeling”. A argumenta cu pa surpasa e retonan menciona ta necesario cu e paisnan den Reino, a base di igualdad, percura pa e necesidadnan mutuo di Reino y alabes duna e sosten necesario.
Aruba ta enfrentando y ta reconoce su retonan como isla chikito y semper tawata dispuesto pa acepta ayudo y sosten di Reino. Pero, e ayudo y sosten no por sali for di un base unilateral. Rocco Tjon durante su disertacion a argumenta cu un Reino fuerte ta nifica ofrece miho sosten y duna otro como pais e espacio pa desaroyo teniendo na cuenta e situacion local riba tereno social, economico y financiero. Tambe, un Reino fuerte ta nifica duna otro oportunidadnan y derechonan igual como pais.
Rocco Tjon ta splica cu Aruba ta enfrentando retonan financiero, retonan cu e situacion di Venezuela pero tambe retonan hopi grandi riba tereno social. E delegacion di Aruba recientemente a aserca e representantenan di Hulanda cu tabata riba e isla cu e pregunta di con nan ta mira e desaroyonan riba Aruba. E representantenan Hulandes, en corto, a conclui cu tin un presion social grandi riba e isla, su institucionnan y e comunidad. Pa motibo di e situacion financiero precario, e presion ta enorme.
Mirando e desaroyonan actual, Parlamento di Aruba ta tumando pasonan concreto pa mehora esaki. E ta di gran importancia cu e accionnan pa mehora e situacion financiero riba e isla no tin como consecuencia causa mas dolor na e comunidad. E ciudadano di Aruba mester por a confia cu tur organonan di supervision manera Parlamento y CAFT tabatin e bienestar di pais y su pueblo na pecho y como prioridad.
Rocco Tjon a sigui splica cu control di finansas ta bay man den man cu prioridad corecto di maneho. Di e forma aki e problemanan social ta ricibi su atencion y ayudo debido y simultaneamente e economia di pais ta wordo stimula.
Por ultimo Rocco Tjon den su discurso a referi na e hecho cu tamaño di un pais no mag wordo mal uza den Reino ora ta trata na yega na solucionnan comun.
