Rocco Tjon (MEP): Hulanda creando un crisis constitucional

“Despues cu Gobierno di Reino a yuda perhudica finansa publico di pais Aruba, awor nan kier crea un crisis constitucional”, asina Rocco Tjon, miembro di Parlamento y alabes lider di fraccion di MEP, a duna di conoce den un comunicado emiti awe. Un ke otro tin di haber cu e postura cu MEP a tuma den Parlamento contra CAft, contra Gobierno di Hulanda y alabes contra Koninkrijks Ministerraad. E reaccion di Parlamentarionan di Hulanda y despues e carta di CAft ta mustra e crisis cu e fraccionnan den coalicion mes a hinca Gobierno den dje awo. Un crisis cu dificilmente lo por sali for di dje sin daño na imagen.

FINANSA PUBLICO

Ta importante pa señala cu na 2009 Aruba tawata conoce un situacion financiero sano. Na 2014 Hulanda a interveni door di “ondeugdelijk bestuur” di Gabinete Eman II. Na 2015 Gobierno di Reino a tuma e supervision financiero over pero enbes cu e situacion financiero a drecha el a empeora. Pues Gobierno di Reino a tene “onbehoorlijk toezicht”.

Tres acto desastroso di Gobierno di Reino cu a perhudica nos pais, ta e hecho cu nan a permiti Mike Eman traha presupuestonan ficticio cu tawata conta cu remision di debe na SVB, supuesto entradanan di apertura di CITGO na 2016 y supuesto entradanan di apertura di CITGO na 2017. Te hasta ora CAFT a señala e actonan cosmetico aki, Gobierno di Reino no a actua y a permiti’e.

E siman aki e Parlamentario a reuni cu Helen van der Wal, miembro di CAft representando Gobierno di Aruba. E expresion di cara di Van der Wal ta splica tur cos!

CRISIS CONSTITUCIONAL

Ta importante pa nota cu a base di e ley di supervision financiero nobo, keto bay tin supervision independiente. Solamente a cambia tur e aspectonan anti-constitucional.

Tratamento di e ley aki a tarda pa e hecho cu Hulanda kier a negocia acomodacion di un ex- politico Hulandes, cual tawata empugna cu e ley. Es decir, e tardansa no tawata culpa di Parlamento, manera Raymond Knops ta insinua. E ta keda insinua cu no tin cumplimento cu e protocol cera entre Aruba y Hulanda. Knops mester compronde cu un protocol entre 2 gobierno hamas por limita un Parlamento. Esey ta e esencia di un estado di derecho. Pero ta parce cu Hulanda kier forsa Aruba actua contra su constitucion of kier crea un crisis constitucional.

Adicional mester nota cu Gabinete Wever-Croes ta cumpli cu aspectonan di maneho, manera palabra den e protocol. Y Raymond Knops sa esaki. Ainda nos por corda su palabranan di elogio pa e maneho di sra. Evelyn Wever-Croes.

Secretario di Estado Raymond Knops di Hulanda a alerta Aruba for di lunanan atras caba riba cumplimento cu locual nan mes a acorda den e Financieel Economische Memorandum (FEM). Hulanda ta bou di e impresion awor cu Minister Xiomara Maduro ta priminti mas cu e por/ta cumpli. Awor riba dje Gobierno ta purba di hunga Hulanda “buitenspel” via nan Parlamento. Un strategia cu Hulanda no ta aprecia y awor ta uza un tono basta arogante contra Aruba. Den e proceso Gobierno di Aruba a “sacrifica” Parlamento tambe pasobra te awe no a presenta nan amienda ma Gobernador.

PA CONCLUI

Nos ta comparti Raymond Knops su preocupacion pa loke ta e debe halto. Esaki sinembargo ta uno cu Hulanda mes a yuda crea. Pa loke ta e supervision financiero net nada no a cambia. Dus e ponencia cu lo a desmantela supervision financiero ta incorecto.

Pero locual tin nos mas preocupa ta e postura Hulandes pa no respeta democracia y nos estado di derecho. Y Knops tin tur su rason cu e ultimo palabranan pa loke ta e situacion aki no a wordo papia ainda. Y e palabranan lo resona internacionalmente si ta necesario.

Manera Raad van State di Hulanda mes ta señala: “Het staat de wetgever vrij om in een wet af te wijken van een reeds bestaande wet en dat dit een fundamenteel democratische verworvenheid is. Immers kan het niet zo zijn dat de effectuering van wijzigingen die door verkiezingen gelegitimeerde (nieuwe) wetgever nodig of wenselijk vindt, geblokkeerd wordt (W04.18.0031/I.VO)”.

Noticia relacionaMas for di e autor