“Ultimo simannan nos por tuma nota di e discucion cu ta andando riba indexering pa empleadonan publico. Sinembargo no por hiba e discucion y negosacion riba e topico aki sin tene na cuenta e situacion financiero di pais Aruba”, asina Roco Tjon, lider di Fraccion dio MEP den Parlamento a duna di conoce. El a participa na eleccion pa prome biaha na september 2017 y a logra no menos di 1213 voto riba su nomber. E ta e Parlamentario cu mas voto den henter e fraccion di MEP actualmente.
Si bay di acuerdo cu indexering, manera diferente sindicato ta exigi, esey lo tin consecuencia pa tur sector y tur ciudadano. P’esey ta importante pa Gobierno tuma un decision responsabel y no popular.
GASTONAN DI BUREAUNAN DI MINISTER Y PERSONAL
Ta importante pa keda accentua e aspecto aki pa e motibo cu e factor cu supuestamente e bureaunan di Minister ta yena cu empleadonan ta wordo uza pa hustifica indexering. Manera a wordo treci pa dilanti den un articulo anterior, Gabinete Wever-Croes a baha e gastonan aki ya caba cu 20 miyon florin. Manera ta conoci tambe indexering lo nifica aumento di gastonan di personal den sector publico. Y esaki ta un punto di discucion cu Hulanda. Pasobra e gastonan di personal, muy particular bou di gabinete anterior a subi astronomico.
VOORJAARPREMIE, NAJAARSPREMIE Y REPARATIEPREMIE
Ta importante pa splica cu e aña aki, apesar di e retonan financiero, Gobierno a percura pa aumenta e voorjaarspremie, najaarspremie y reparatiepremie di e empleado publico. Den e tabel por wak cu esaki ta nifica un aumento total pa 2019 di 318 florin. No mester lubida cu e aumento aki lo sigui te cu 2024. Na 2020 cada empleado publico lo haya adicional un total extra di 315 florin. Na 2021 tambe adicional 318 florin extra. Na 2022 tambe adicional 318 florin extra. Na 2023 tambe adicional 318 florin extra. Y na 2024 nan lo haya adicional 315 extra.
Den e tabel por mira cu na 2017 empleadonan publico tawata cobra 4157 florin extra na e tres premie nan menciona. Gabinete Wever-Croes sinembargo a sera e compromiso, den e temporada cu nos conoce retonan financiero, cu esaki lo aumenta cada aña. Y na 2024 cada empleado publico lo cobra pa anja 6387 florin extra na e tres premienan menciona. Es decir un aumento di 2230 florin.
PA CONCLUI
Manera menciona e topico aki ta uno serio. No un topico pa haci politica cune. Esey ta conta pa politiconan, sindicatonan y ciudadanonan. Motibo ta cu e consecuencianan di e decision cu bay wordo tuma lo afecta nos tur. Nos ta pensa cu mester tuma e decision responsabel. Y cualkier decision cu wordo tuma no por afecta e normanan financiero stipula. Aruba mester sali di e debacle fianciero cu Gabinete EMAN I y II a hinca nos aden.
