Rocco Tjon: Camara di Comercio ta haci acusacionnan infunda!

631

“Ayera den noticia mi por a tuma nota di cierto expresionnan haci door di Kamer van Koophandel (KvK) den cuadro di e aumento di salario minimo. En general pa loke ta trata desaroyo economico puntonan valido. Valido desde 2009 caba”, asina Lider di Fraccion di MEP, Rocco Tjon MBA, a duna di conoce awe.

Normanan pa sector publico, segun e ley di LAFT, ta algo cu ta existi prome cu e Gobierno actual a asumi responsabilidad. Segun rapportnan imparcial di Raad van Advies, Caft, ARA, a determina obhetivamente cu e maneho anterior, qua entrada, tawata a base di entrada incidental, dus no a base di stimula economia y “economic growth”.

Apesar di esey tambe semper a haci uzo di proyeccionnan irrealistico pa loke ta trata nos economia y a base di proyectonan fantasma manera supuesto apertura di nos refineria. Es decir e “les di economia” cu KVK a trata na duna ayera na noticia lo mester a wordo duna algun aña pasa kisas na mandatarionan irresponsabel.

E comentarionan ta perde valides mas aun ainda ora cu mandatarionan actual a anuncia cu lo haci un estudio y nos Minister President actual a mustra con na su Ministerio solamente caba a baha gasto enormemente.

“E Parlamento aki lo haci su trabou manera debe ser, es decir KVK no tin nodo di preocupa. Nos ta dispuesto pa traha cu tur organisacion, hende y partido, pero semper a base di respet mutuo y sin haci acusacionnan infunda”, asina e lider di fraccion di MEP den Parlamento a termina bisando.