Rocco Tjon a duna Andin Bikker un siman pa responsabilisa su maneho

Diahuebs ultimo e comision fiho di husticia den Parlamento a tene un reunion cu Minister di Husitica, mr. Andin Bikker. Presidente di e comision fiho di asuntonan hudicial di Parlamento, Rocco Tjon di MEP a yama e reunion cu tres punto riba agenda. Ta trata aki di 1) Situacion di K.I.A. 2) Reorganisacion di departamentonan den Husticia 3) Desaroyonan actual den Husticia.

SITUACION NA KIA
Minister di Husticia a duna di conoce cu riba termino largo a inicia e proceso pa yega na un Institucion Coreccional nobo y duradero. Na mes momento, den nomber di e comision, Rocco Tjon a puntra Minister pa entrega Parlamento un nota den cual ta stipula pasonan concreto con lo evita cu den futuro huidanan lo tuma luga for di nos instituto coreccional.

Ta desea pa haya e plan aki otro siman na momento cu Parlamento trata ehecucion di presupuesto 2019. Esaki pa si ta necesario aloca fondo adicional pa K.I.A. pa por garantisa siguridad den e instituto.

REORGANISACIONNAN ANDANDO
“E structura di un organisacion ta di vital importancia pa su funcionamento. P’esey nos a puntra pa haya un update di e reorganisacionnan di K.I.A., Migracion, K.P.A., C.E.A y G.N.C.”, asina Rocco Tjon a duna di conoce despues di e reunion cu porta cera den Parlamento.

“Pa loke ta e reorganisacion di K.I.A, Minister a duna di conoce cu esaki lo ser formalisa otro siman den Conseho di Minister. Esun di C.E.A., Immigracion y K.P.A. lo termina y wordo formalisa prome cu fin di aña. Pa loke ta G.N.C., mirando cu e reorganisacion aki a wordo inicia mas despues cu e otronan, ta premira cu esaki no lo keda cla e aña aki, pero mas bien na comienso di 2020”, di acuerdo cu e lider di Fraccion di MEP.

PA CONCLUI
Desaroyonan dentro di Husticia tin atencion di e comision fiho den Parlamento. P’esey ta invita un y tur pa sintonisa e reunionnan publico dialuna y diamars benidero den cual lo atende entre otro cu e situacion na K.I.A. Fraccion di MEP ta dispuesto pa coopera cu Minister di Husticia pa aloca recursonan necesario pa entre otro K.I.A., pa garantisa siguridad pa nos comunidad y personal di K.I.A. E comision a bisa na final di ta keda en espera di e nota di Minister pa haci e cambionan necesario.

Comments

comments