E cantante popular Rocco Franken di Buleria via su abogado mr. Dello Gomez a manda carta pa Serlimar. E motibo ta pasobra cu riba truck di Serlimar tin su potret na grandi sin cu el a duna autorizacion pa cu esaki. Na 2015 berdad el a haci un grabacion pa un campaña hunto cu un fotoshooting. Esey tabata na 2015 pa un campaña cu awe no ta existi mas.
Awe den 2019 a ripara cu tin diferente artista cu Serlimar a cera acuerdo cu nan pa asina promove Serlimar cu nan imagen riba e trucknan. E artistanan aki logicamente a cera un acuerdo cu Serlimar. Cu Rocco Franken pa e promocion aki no tin acuerdo. Awor parce tin derechonan legal cu mester wordo respeta di cada artista. Fuentenan den Serlimar ta bisa cu nan kier sinta cu Rocco Franken y asina mira si por yega na otro riba algo y papia riba uso di su imagen pa promove Serlimar cu potretnan saca den un otro campaña.
Tur cos ta mustra cu den Serlimar mes tabata tin cambionan den e departamento di mercadeo y pesey nan no sa precies kico tabata e deal. Durante un of otro traspaso kizas e cos no a cana bon. Awor ta sinti cu tin interes di partidonan pa asina yega na un solucion pa e diferencianan cu tin pa uso di e potretnan riba ekipo di Serlimar.
