Robert Candelaria: Na luga di inverti placa den helicopter por a uz’e den otro cosnan mas importante

Den Parlamento a tuma luga un reunion publico unda cu a yama Minister di Husticia, Andin Bikker. Parlamentarionan a haci diferente pregunta over e asunto di asilo politico. Tabata kier a haya sa e status di esaki y con Gobierno di Aruba ta tratando cu esaki. El a splica diferente cosnan cu a papia cun’e caba den reunion di comision di husticia.

Pa parlamentario di fraccion di AVP, Robert Candelaria, tabata importante pa haci pregunta pa pueblo por tin un tiki trankilidad kico por spera. Te cu dia di awe instancianan cu tin e autoridad pa controla hendenan cu ta kedando ilegalmente na nos isla, por haci’e y te dia di awe por deporta cu ta kedando na nos pais ilegalmente. P’esey na final di dia esey ta importante, pasobra nos fronteranan mester ta cera y mester cuida cu hendenan no documenta y no tin motibo di ta na Aruba no por drenta tampoco. Si nan drenta, gara nan y hiba nan bek nan pais.

 

Como pueblo semper nos a mira y te dia di awe mira Venezuela como nos ruman. Esey ta nifica cu tin bon lasonan historico cu otro. Loke cu nos tin cu realisa ta cu un pais di 100 mil hende nos no ta e solucion pa un pais cu ta 30 miyon hende. Ora cu fraccion di AVP kier a pone den prespectiva natural kier un solucion p’e problema di Venezuela, kier mira cu hendenan ta biba na paz, tin suficiente di come, tin trabou, e pais por prospera di nobo. Mester keda realistico cu nos pais no ta e solucion. Ora pone den balansa cu nos tin di duna e señal pafo cu Aruba ta cuida su fronteranan, Aruba no ta habri sin mas. Hendenan cu ta bin aki nan sin permisonan valido, lo deporta y manda bek pa nan pais.

“Ami a haci diferente pregunta por escrito den direccion di Minister. Ultimo cu mi a haci ta 2 carta cu mi a manda over di e helicopter.” Tin masha hopi pregunta relaciona cu con e procedura a bay na binimento di helicopter pa Aruba. Semper Robert Candelaria tabata pro pa Aruba tin su mesun helicopter, pero tambe por a uza e placa cu ta bayendo p’e helicopter pa cosnan cu ta mas importante den comunidad.

Actualmente tin problemanan cu ta hopi fastioso y ta afectando nos comunidad den un manera hopi profundo, por ehempel abuso di menornan cu ta algo cu mester pone atencion, e fondonan, tur loke ta necesario pa deal cu e problema aki. Cambionan di ley cu mester bin, pero tambe tin otro problemanan social, problemanan di criminalidad cu no ta e miho manera di a pone placa p’e helicopter. Si a puntra profesionalnan di Cuerpo Policial kico ta nan opinion unda mester uza e placa aki, unda cu tin camindanan mas importante y prioridadnan mas halto cu por a bay den dje.

Minister a duna contesta na un periodista riba e cartanan cu e Parlamentario a manda, e mandatario a indica cu e mester compronde cu nan ta goberna un pais y mester warda riba e contestanan. Esaki di un Minister cu semper den pasado a bisa cu e ta haya cu no por ta asina cu ta tarda di contesta su preguntanan ora e tabata den Parlamento. El a facilita e preguntanan na prensa y nan tabata preguntanan zakelijk y a mira e standpunt cu e mandatario a tuma no ta esun corecto. E trabou di Parlamentario ta di representa pueblo y haci preguntanan, cuestiona maneho, cuestiona trabou di un minister den nomber di pueblo. Su trabou ta goberna e pais pa pueblo y e tin cu raporta na Parlamento. Ora cu un Parlamentario haci un pregunta, ta trabou di Minister pa contesta.