Robert Candelaria: Gobierno a aumenta presupuesto di Husticia cu 9 miyon florin

“Nos critica a yega na oido di Minister Andin Bikker y e presion cu a bini di e personal di henter e aparato hudicial tambe a yuda pa e Minister por a cambia di posicion.

 

Awe den un Nota di Cambio, el a presenta un aumento di mas cu 9 miyon florin mas den e presupuesto di husticia”, asina Robert Candelaria, miembro di Parlamento pa e Fraccion di AVP a duna di conoce durante e reunion publico di Presupuesto 2018 di pais Aruba.

Parlamentario Robert Candelaria: Contento cu Minister Andin Bikker a corigi presupuesto di Husticia y a aument’e cu 9 miyon florin

Posted by 24ora on Monday, April 23, 2018

E Parlamentario tabata orguyoso cu e mandatario a considera su sugerencianan y asina a otorga Cuerpo Policial Aruba un aumento di casi 3 miyon florin extra, cu ta haci asina cu awor si e presupuesto pa Polis ta yega na e nivel di aña 2017, bou maneho di AVP. Di otro banda a aumenta e presupuesto di KIA cu 2.4 miyon adicional, cu tambe ta hiba nan na e mesun nivel unda e Gobierno di AVP a laga nan aña pasa, Ministerio Publico a haya 800 mil florin adicional, Voogdijraad, Orthopedagogisch Centrum y Slachtofferhulp ta hayando 5 miyon adicional.

 

“Dicon mi ta haya esaki interesante? Pasobra mi ta contento cu e trabou di oposicion cu nos a bin ta haci, mustrando unda tin cosnan cu nos ta pensa cu no ta corecto den e presupuesto y cu awor a haya debido atencion di Gobierno y cu toch a core cambia nan. Mi por duna ehempel, den e parti di Polis y KIA, a aumenta e presupuesto pa overtime, ainda no manera e mester ta, pero nos ta mira si cu tabatin oido y a haci cambionan realistico. Ainda falta mas pa yega unda e tabata bou AVP”, asina Parlamentario Candelaria a enfatisa.

 

Mas leu e ex Inspector di Polis y actual Parlamentario ta señala cu “Awor si tin placa pa agentenan policial nobo, den e cambionan haci. Esaki tabata necesario pasobra si di berdad e Minister kier mira mas ‘blauw’ riba caya, si e kier crea mas departamento, e ora ta necesario pa e tuma mas Polis. Kiermen ora mira aumento den overtime y pa Polisnan nobo, nos ta kere cu ta pasonan den e bon direccion”.

 

Na final, Robert Candelaria a sigura cu esaki ta e forma cu lo hiba oposicion, den un forma serio y sin insulta hende y atakenan personal, sino mas bien presenta cifranan concreto y retonan den maneho, cu speransa cu e puntonan ta haya oido y ta corigi nan debidamente, manera cu Minister Andin Bikker a haci den su ‘nota di cambio’.

 

E Parlamentario a termina bisando cu “Nos ta hopi contento pa mira e desaroyo positivo aki”.