Parlamentario di Fraccion AVP, Robert Candelaria tabatin un encuentro cu ex Comisario di Polis di Aruba, esta Jan van der Straten, cu ta riba nos isla di vakantie.
E encuentro tabata ameno, unda a recorda tempo cu nan tabata traha cu otro den Cuerpo Policial Aruba.
Tempo Robert Candelaria a inicia su carera den Cuerpo Policial Aruba, e tabata traha bou mando di Jan van der Straten y den e encuentro aki nan a elabora riba diferente topico, manera temanan di pasado y pa futuro. Jan van der Straten a aprecia cu Robert Candelaria tabatin un tiki tempo pa nan por a sinta cu otro. E temporada cu ambos tabata Polis, e contacto tabata uno bon, asina el a expresa. Despues cu el a baha cu pensioen, Jan van der Straten a bay biba bek na Hulanda y awo e ta cu vakantie unda e ta topando cu diferente persona.
Jan van der Straten a bin traha na Aruba pa setup Landsrecherche y despues a acerk’e un biaha mas pa traha den Cuerpo Policial Aruba. Aki el a traha casi 22 aña den Cuerpo Policial, dunando guia y creando varios departamentonan nobo y manteniendo un bon relacion cu Sindicato di Polis. E ta corda cu a intermedia pa e sindicalistanan por a sigui curso specialisa na Hulanda, cu sin duda a yuda crea talentonan den sindicalismo riba nos isla, asina Jan van der Straten a expresa. “Nos tabatin bon contact na Tilburg y esaki tabata hopi bon pa nos hendenan, pasobra a zorg pa nan a haya un opleiding”. Asina aki el a percura pa tabatin un organisacion cu tabata sa con pa traha bon y con coleganan ta traha hunto y na beneficio di pueblo di Aruba.
Pa Robert Candelaria di a topa cu esunnan cu el a conoce y traha bou di nan mando durante su prome añanan den Cuerpo Policial Aruba, tabata algo great. Tempo el a conoce Jan van der Straten como Comisario y e tabata den e management team cu Korpschef Alwyn Nectar. Durante e tempo aki Robert Candelaria a traha den diferente departamento. Den e periodo aki el a siña hopi y e tin aprecio na personanan cu a significa algo den su carera policial.
Robert Candelaria a bishita Richard Martus, kende tabata su prome chef di districto Oranjestad. Tambe el a traha cu Karel Jeandor, Inspector Josefa y hopi mas. Despues cu el a tende cu Jan van der Straten ta bin Aruba cu vakantie, Robert Candelaria di biaha a busca pa topa cun’e un rato.
E carera politico ta uno cu Robert Candelaria no tabatin ambicion p’e, pero haciendo esaki pa algun luna el a gusta. El a ripara cu por contribui hopi y por yuda pueblo den diferente manera. Por bin cu proyectonan di ley, pero tambe controla Gobierno. Robert Candelaria ta creciendo den e area politico manera el a haci den Cuerpo Policial. “Den e trabou aki tambe ta algo cu bo tin cu crece den dje”, asina Robert Candelaria a termina bisando.
