E fecha di 3 di december ta un dia cu normalmente lo ta di celebra/ conscientisa y conmemora hunto cu nos comunidad cu tin cualkier forma di limitacion fisico, esta Dia pa Hende cu Limitacion. Pero sin cu e meta poni dilanti a keda concretisa, lo kier uza e dia di awe pa recorda e compromiso pa cumpli y yega na e meta final.
Robert Candelaria ta sigui cu e meta y lo kier recorda tur cu a forma parti di e palabracionnan y/o compromiso aki cu nos no falta hopi, pero ta net e poco aki ta pisa mas.
Un lucha cu a inicia cu defunto Jos Solagnier den feliz memoria, cu a haci e peticion pa yega na carchinan di parkeo pa persona cu limitacion den nos comunidad. Na momento cu a tuma e peticion y traha riba dje, a sigura cu pronto e lo bira un realidad.
Candelaria ta remarca cu aunke Parlamento ta diferencia hopi biaha di opinion, den e tema aki unanimamente nan a duna sosten pa bin cu e carchi di parkeo cu peticion (di parti fraccion di MEP ) pa agrega un parti caminda ta otorga parkeo gratis na esnan cu limitacion den area di Censo. Metanan fiho cu ta keda prioridad pa cumpli cun’e.
Un aña despues nos no a yega caminda kier yega, ta locual Robert Candelaria a bisa. Den comunidad na momento cu bo topa cu cualkier persona, sea esnan cu tin e topico aki na curason sea personal of den organisacion, ta resalta e positivismo y e bista alegre den bida cu ta duna nos e empuhe aun mas di continua y logra e meta.
Deseo di Robert Candelaria, como Parlamento, mira Gobierno y departamentonan haci hopi mas pa tur cu ta biba/traha/adapta y ta bringa pa inclusion y cu sigur merece ayudo y hopi mas. Hopi ta esnan cu di nan mes no por logra pero ta spera cu nos como comunidad lo logra esaki hunto pa nan.
E posibilidad ta den nos man, nos ta hopi cerca, ta locual Candelaria a enfatisa. Pero nos no a yega meta final. Carchi di parkeo ta e meta, ohala nos por bisa pronto cu nos a logra esaki pa nan, cu nan tin nan carchi di parkeo, cu luga destina pa nan. Pero tambe sali na vanguardia riba esnan cu ta comete infraccion na sitionan destina pa e comunidad cu tin limitacion. Cu polis / Ministerio publico por traha proces verbaal y caminda por yega na conscientisacion caminda pueblo lo tin cu respeta e espacio y derecho cu nan tin riba parkeo cu ta un stap chikito pero un logro grandi den inclusion.
A wak bek cu den pasado hopi otro mocion a pasa pa yuda e comunidad cu limitacion den forma di subsidio y/o otro pero a keda te na deseo. Locual kier mira awo ta resultado. Hecho!
E dia di awe nos ta para keto pa recorda cu en berdad kier celebra pero na prome luga kier pone e luz bek riba caminda cu falta ainda. Un bon dia pa bisa ta basta, ban cumpli.
