Robert Candelaria di bishita cerca Minister di Husticia Corsou Quincy Girigori

Siman tras di lomba tabata uno bastante importante pa Parlamento di Aruba.

Un delegacion di Parlamento a atende reunion di IPKO cu a tuma luga na nos hermana Isla Corsou. Parlamentario Robert Candelaria a comparti na su yegada algun detaye adicional referente reunionnan cu a tuma luga.

No solamente reunionnan di IPKO tabata riba agenda pero entre nan a probecha e momento p’asina sinta cu Minister di Husticia di Corsou Quincy Girigori como tambe parlamentario El Alyoubi p’asina intercambia riba sucedido, reto pero principalmente solucionnan cu lo por beneficia e islanan di Reino.

Posibilidad pa traha hunto semper ta na miho interes di e pueblo y ta locual cu a discuti ampliamente riba dje den e reunion cu e Minister actual di Corsou. E miho manera pa traha ta hunto y yega na logronan den Husticia, ta algo cu sigur a keda topico di importancia riba mesa, mirando tambe e problematica cu ambos pais ta pasando aden na e momentonan aki.

Robert Candelaria di su banda ta mira e reunion aki como uno beneficioso y ta gradici e amabilidad y ricibimento, un cartera manera esun di Husticia no ta uno fasil y como tal ta aprecia e tempo cu a tuma pa ricibi y dialoga riba topiconan/ solucionnan cu lo por bin dilanti pronto den cooperacion cu otro riba e Isla rumannan.