Robert Candelaria (AVP) y docente di Universidad di Aruba den combersacion riba abuso di mucha

Durante e siman aki a tuma luga un zoom meeting cu Clementia Eugene, docente na Universidad di Aruba, riba e impacto devastador di abuso sexual di mucha riba nos isla. Parlamentario Robert Candelaria di su banda tambe a duna su opinion riba e topico aki pa asina hunto cu profesionalnan yega na solucion den un forma preventivo pa yuda comunidad cu e problematica di abusonan cu ta tuma luga.

Clementia Eugene ta docente di Social Work and Development na Universidad di Aruba. E ta un di e profesionalnan di Saint Lucia, cu amplio experencia den e ramo di trabou. Tambe a fungi como director di Sociale Zaken y Voogdijraad na Saint Lucia.

Actualmente e ta haciendo diferente investigacion cientifico pa su titulo di PhD. Pa locual ta su estudio, e ta investigando den forma di National School Survey y ta haci uzo di data oficial cerca departamentonan di gobierno pa forma un bista mas completo di e problema di abuso di menor na Aruba.

Mester agrega cu docente Eugene tambe lo investiga e problema (issue) aki for di punto di bista di human development. Kico e efectonan di abuso di mucha ta en general riba e persona y con esaki ta afecta henter e comunidad despues.

Robert Candelaria ta sigura cu mester traha cu tur hende den comunidad pa hunto yega na un solucion. Mester bisa no na abuso di mucha den un forma concreto y den colaboracion di un y tur. Candelaria a menciona cu den su combersacion cu Clementia a duna ehempel di e “Me Too Movement” cu ta uno mundialmente reconoci y sosteni.

E impacto riba bida di hende ta grandi, sin discrimina bo status, sexo of criansa cu bo a ricibi. Tin hopi hende exitoso den nan bida y carera, cu a pasa den e trauma aki, cu a keda cu efectonan di abuso pa semper. Social media/internet mientrastanto a duna hopi victima y sostenedo rond mundo un bos y esaki ta brinda comunidad un nivel nobo di awareness.