Parlamentario Robert Candelaria di fraccion di AVP a reuni cu parti di e comision pero tambe cu trahadonan di Fundacion pa nos Comunidad e siman cu a pasa. Un encuentro cu a bay den bon esfera y cu hopi informacion valioso.
Candelaria ta expresa cu igual cu e encuentro anterior cu Rode Kruis Aruba, esun aki cu Fundacion pa nos Comunidad ta duna un bista riba e trabou incansabel y dedicacion cu alma y curpa cu cada persona ta hinca den locual nan ta haci pa e comunidad.
Na momento cu e realidad ta pone cu situacion ta bira hopi dificil, cu e pueblo ta perde trabou (of a perde hopi entrada) , cu cuminda no ta yega riba mesa sin lubida riba e echo cu hopi ta esnan cu a bira malo y no por a sigui traha. Lamentablemente tambe tin esnan cu a perde nan bida cu ta pone mas pression riba e situacion cu ya caba ta dificil.
No mester descarta cu e trabou di Fundacion pa nos Comunidad no ta algo cu a bin di awo cu e pandemia a presenta pero ta yudansa cu nan tabata brinda na mas di 200 famia caba. E yudansa aki tabata uno pa siman, na momento cu Covid-19 a presenta a aumenta drasticamente cu a pone awo cu nan ta riba 5MIL famia. Ricibiendo yudansa caritativo.
Robert Candelaria ta remarca cu esaki ta duna un bista riba e situacion precario cu nos comunidad ta aden. Hopi ta esnan cu talves ta pensa diferente y ta kere cu e no ta dje malo ey of e ta val mee, pero e realidad ta otro.
Pregunta importante den e momentonan aki: Cuanto famia ta den nececidad?
Cuanto famia ta den nececidad pa pone cuminda riba nan mesa, ta locual a puntra den reunion cu e fundacion, y den nan concepto un totalidad riba famianan cu mester di ayudo/ sosten den e momentonan aki ta aproximadamente 15MIL famia, cu un promediao di tres persona pa famia. Naturalmente ta varia entre mas grandi y of mas chikito pero ta papiando di mas o menos 45Mil hende cu mester di un yudansa pasobra nan mes no tin e fondo pa pone pan riba mesa.
Cu e cifra aki, parlamentario Candelaria ta urgi y haci un peticion na e pueblo di Aruba, cu si ta den bo alcance pa duna algo (No mester ta hopi) pasobra esey ta mas cu locual esun eyfo na e momentonan aki, mirando cu e no tin mes.
No solamente aporte financiero, pero e por ta den forma di trabou boluntario. E gesto aki sigur ta bonbini semper na e fundacion. Na momento cu e pandemia a presenta, Fundacion pa nos Comunidad ta conta cu mas o menos 1000 boluntario entrenan personanan di sector hotelero, sector priva, militarnan, iglesianan y sigur algo admirabel con ta yega hunto pa traha pa e comunidad. Bunita pa por mira cu na momentonan di mas dificil ta yega hunto, hende ta bin dilanti y bisa “Mi kier yuda”.
Sosten financiera na e momento aki ta crucial pa e fundacion, pa por abastece y continua cu e trabou aki. No solamente awe, pero premirando locual cu por presenta den futuro. No solamente relaciona cu e pandemia pero tambe e crisis financiero mirando cu nos economia ainda no a lanta.
Robert Candelaria como boluntario e mes ta mira e nececidad cu propio wowo
E motibo cu ta brinda sosten na tur Fundacion no ta solamnte como politico pero ta uno personal. Durante su trabou boluntario ta mira first hand kico e pueblo ta pasa aden y con grandi e nececidad ta y ta comparti su preocupacion cu e perspectiva di hende ta laga mustra cu e situacion no ta dje malo ey. E realidad ta cu e nececidad ta inmenso y ta pa e motibo aki mes ta duna oportunidad na e fundacionnan pa haya mas exposure posibel y asina concientisa e pueblo eyfo cu tin un nececidad hopi grandi y cu bo sosten ta esencial. E yamada ta pa e yega na bo curason pa asina nos yuda nos pueblo.
E gratitud na e fundacion y na cada boluntario , directiva , trahado ta sincero y di curason. Si nan no tabata tey, lo tabata tin miles di hende sin nada di come. Algo cu tin biaha ta pasa bou di nos bista, pero na momento di calamidad por aprecia y gradici Dios cu nan ta exsisti y e importancia di nan trabou pero tambe di mira un pueblo cu sentimento pa otro, cu ta convivi y ta duna bek. Danki !
A haya oportunidad tambe pa combersa cu e directora di Fundacion pa Nos Comunidad Gianaika van der Biezen cu a duna spliacion for di momento cu Covid-19 a presenta, con e fundacion a sali y brinda sosten na faminan den nececidad den e ultimo lunanan pero tambe con ta planea di continua cu e yudansa aki. A menciona enberdad cu tin 5mil famia registra pero e fondo actual ta yega pa ayudo na 2.5 mil hende so. Pesey ta urgi e comunidad pa sigui contribui cu e fundacion pa asina nan por yuda e pueblo.
Un situacion cu a tuma nota di dje ta cu a premira cu hopi hende lo mester a regresa na pia di trabou pero sorprendentemente esaki no ta e caso. Economia ta tardando pa recupera. Di otro banda tin hopi famia cu tabata haya ayudo di bisiña, amigo, famia cu no por a continua cu e ayudo aki y cual ta pone cu mas hende ta bati na e fundacion su portanan.
