Cannabis ta un droga! Recientemente un discucion entre Minister Lampe y un periodista a bira topico popular den comunidad. Pa e motibo aki Parlamentario Robert Candelaria a bin dilanti pa asina pone hechonan riba mesa pa locual ta trata e tema aki. For di e Minister por a compronde entre Cannabis no tin confusion entre medicinal y recreacional concluyendo for di su palabranan cu e no ta un droga. Robert Candelaria, un ex Alto Inspector di Polis a clarifica cu na Aruba e ta un droga y tanten cu no cambia e “landsverordening verdovende middelen”, e ta keda un droga!

Den articulo 2 den ley ta bisa cu bo no por cultiv’e, plant’e como tambe den articulo 4 cu bo no por tin’e cerca bo, bend’e of haci algo cune.Como ehempel a bisa, cu si un persona no gusta e delito di ladronicia y e no ta cay mi bon y di awe en adelante mi no ta bay kere den dje, e no ta bay cambia den ley cu ladronicia ta prohibi. E ta keda contra ley. Cualkier crimen cu nos sa cu awo ta contra ley, bo djis imagina/inventa cu e no tey mas ta igual na un avestrus hincando su cabes den santo y kere cu e problema no tey mas.

E problema tey y lo keda crece y pesey mester percura pa no legalis’e pasobra e problema lo bira algo cu no por drecha. Actualmente e ta contra ley, ban manten’e contra ley y ban traha riba prevencion.Tanten cu no cambia e “landsverordening verdovende middelen”, tanten cu e articulonan aki ta manera cu nan ta, e ta keda un droga y ta keda prohibi pa nos ley y ta keda ilegal. Sumamente importante pa e comunidad compronde.

Den e mes un rosea Robert Candelaria ta menciona cu si e Gobierno aki haya ta necesario pa legalisa e remedi di cannabis anto e ora ey for di prome dia di trabou Minister Dangui Oduber por a haci esaki. Minister Oduber por a drenta, firma su decreto y hacie legal, caminda via un dokter ta haya un receta y na botica ta haye! Pero despues di dos aña no a bin splica Parlamento (y berdad e no mester, pero el a bisa di lo bin hacie), aunke e por firma su decreto su mes.

Robert Candelaria a sigi bisa cu, pa dos aña largo e keda sin yuda hende cu ta malo y por a beneficia di e remedi aki, cu segun por a compronde di nan, cu ta remedi cu ta ofresce yudansa real, a opta pa no yuda niun hende.

Di otro banda Prome Minister ta mira plantacion di marijuana como un posibel pilar economico pa nos pais, mencionando esaki den un reunion di Parlamento. Dunando motibo pa confucion cu señalnan mixto, cuestionando e ora ta kico e Gobierno aki kier. Pesey ta importante pa comunica cu pueblo. No ta sigur si nan kier legalis’e of no kier legalis’e, medicinal si, recreacional no, cu e tardansa aki ta duna “mix messages” na e comunidad y ta bruha nan.

Na e momento aki e ta contra ley, ley ta prohibi’e, no ta legal pa plant’e, no ta legal pa bend’e, no ta legal pa hum’e, no ta legal pa uz’e den ningun forma y tanten cu no cambia nada, esey ta keda e hecho!

Comments

comments