Dialuna mainta tempran a drenta informacion cu a detene e conocido catochero di Corsou, esta Robbie dos Santos. E detencion aki a tuma luga na Sint Maarten.
E informe oficial di Ministerio Publico di Corsou ta bisa: “Rerecherche Samenwerkingsteam (RST) a caba di detene na Sint Maarten Robbie dos Santos den e caso di asesinato di Helmin Wiels.”
Dos Santos, conoci den mundo di loteria, su nomber ta menciona den e caso Maximus, cu tin di haber cu asesinato di e politico Helmin Wiels. Recientemente, dos Santos a cuestiona e hecho cu su nomber ta menciona, door di e funcionarionan, como esun cu a paga pa e asesinato. Su reaccion tabata “awo nan ta bisa cu ami a duna e ordo,” y e reaccion aki a bini despues cu a menciona su nomber durante e prome dia den tratamento di e caso contra Burney “Nini” Fonseca.
“Pakico e hendenan mester gaña asina hopi y nan no a ni puntrami. Pakico nan ta bisa ami a paga pa e asesinato y despues cambia pa bisa cu ami a duna e ordo. Pakico?” Tabata expresionnan cu el a haci e tempo ey.
Dos Santos, kende ta casa cu un Arubiano, ta bibando na Sint Maarten. Su ruman George Jamaloodin a huy pa Venezuela pero a extradit’e pa Corsou unda a present’e dilanti Corte y a conden’e. 24ora.com ta pendiente e declaracion oficial di Ministerio Publico di Sint Maarten.
