Riu Palace Antillas a organisa un “Thank you Brunch” p’e fundacionnan cu ta rescata cacho y pushinan for di caya, pero tambe di maltrato. A invita 9 fundacion cu ta e Fundacion Luna, New Life for Paws Foundation, Animal Relief Foundation Aruba, Nine Lives Aruba Foundation, Sgt Peppers Foundation, Aruba Animal Shelter, Animal Rights Aruba, Crijojo Trappers Aruba y United Dogs.
Tur fundacion a pasa un rato agradabel cu e staff di hotel a prepara, unda cu a rifa premio entre nan y tambe a disfruta di e canticanan di e banda Robin & the Rebels. New Life for Paws Foundation ta un fundacion cu ta rescata hopi cacho di caya durante henter aña, pero tambe puppies cu hendenan no sa kico pa haci cu nan.
Glenda Geerman di e fundacion a expresa cu nan ta tuma over e puppies, cuida nan y purba pa hendenan adopta nan mas pronto posibel. New Life for Paws Foundation ta gradici Riu Palace Antillas masha hopi pa tur loke e ta haci pa tur fundacion, pero specialmente pa New Life for Paws.
Animal Relief Foundation Aruba ta purba rescata mas tanto posibel cacho y sterilisa nan, mientras cu boluntarionan ta “foster” nan te ora cu nan a recupera. Kathy Andreottola di e fundacion ta agradecido na Riu Palace Antillas p’e bunita gesto aki, pasobra nan por a relaha.
Tur fundacion tabata agradecido cu e atencion special cu nan a ricibi for di Riu Palace Antillas. Dany Nieto di Riu Palace Antillas a expresa cu esaki tabata un oportunidad pa gradici e fundacionnan pa nan bon trabou social di cuida cachonan y pushinan di caya. Riu Palace Antillas ta premira cu mas hotel yuda e organisacionnan aki.
