Riu Palace Antillas a ricibi bishita di Minister di Asuntonan Social y Labor, Glenbert Croes. Gobierno ta combersando cu e sector hotelero, a cuminsa cu Marriott, a bishita diferente hotel, di cual lo sigui pasa na otro hotelnan. Gobierno kier desaroya un relacion cu RIU Hotels & Resorts Aruba como bon ciudadano corporativo cu ta inverti den Aruba. Nan ta inverti den e necesidad di brinda oportunidadnan na trahadonan local, profesionalnan local y contratistanan local.

Riu Palace Antillas y Riu Palace Aruba desaroyando relacion cu Gobierno pa crea oportunidadnan laboral

Posted by 24ora on Tuesday, May 8, 2018

Tur esaki ta a base di ta den un relacion harmonioso entre Gobierno y hotelnan RIU. RIU Hotels & Resorts Aruba ta un compania cu tin dos propiedad cu ta invertiendo riba nos isla, mescos cu Marriott cu tin 3 hotel tambe tin Ritz Carlton y Renaissance cu ta forma parti di nan cadena. Minister Glenbert Croes a señala cu nan kier combersa cu tur riba e posibilidad di coopera cu otro.

Minister di Asuntonan Social y Labor, Glenbert Croes, combersando cu varios empleado di diferente seccion den e hotel.

Ministerio di Asuntonan Social y Labor kier desaroya un relacion cu tur hotel pa crea programanan di training pa hobennan desemplea of hobennan cu ta cobra bijstand, hendenan cu mester di trabou. Tambe pa sigura cu hobennan cu ta caba scol por haya un oportunidad, evaluando con pa train nan pa nan por fit den e mercado laboral orienta riba sector hotelero. Tin diferente hotel cu nan propio estilo di haci negoshi y p’esey mester tin bon cooperacion entre Gobierno y tur hotel.

A cuminsa cu RIU Hotels & Resorts Aruba den un esfuerso pa sigui brinda oportunidad na hobennan local, trahadonan local y contratista local. A habri brasa pa inversionnan di afo, pasobra Aruba mester di inversionistanan di afo y Gobierno ta boga pa duna trahadonan local oportunidad, trata y paga nan bon.

Por mira un cambio positivo na RIU Hotels & Resorts Aruba y ta referi na e relacion cu empleadonan. E Ministerio kier p’e control ta den un presion positivo riba tur sector hotelero y di acuerdo cu e vision di Gobierno. Tambe kier mira cu e hotelnan ta duna hobennan mas oportunidad y no solamente pa trabou, pero tambe pa duna esunnan cu ta traha den hotel oportunidad pa crece den e organisacion.

Minister Glenbert Croes a gradici Gerente General di Riu Palace Antillas, Juan Blanco, p’e oportunidad cu nan a ricibi, pa manda un señal cu ta desaroyando un relacion nobo entre Ministerio di Asuntonan Social y Labor, Gobierno y hotelnan RIU. E ta spera cu e relacion aki por brinda yiunan di tera mas oportunidad pa forma un carera den ambos hotel RIU.

Riu Palace Antillas tabata contento di e bishita ricibi di Minister di Asuntonan Social y Labor, unda cu ambos lo traha hunto pa crea oportunidadnan laboral. E bishita aki pa Juan Blanco tabata importante pasobra asina aki Riu Palace Antillas ta sigui desaroya relacion cu Gobierno pa un miho futuro pa e industria turistico di Aruba.

RIU Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 50 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.

Comments

comments