Canta autor hoben di hopi exito riba nos isla a saca un cancion nobo yama “24ora”. Ritmo Real ta un artista cu ta gosa di reconocemento local y internacional y cu un trayectorio amplio di añas di esfuerso y dedicacion tras di nan nomber.
E cancion aki ta cuminsa y nace den menos di 24ora. E ta basa riba experiencia y acontecimentonan den bida di diferente persona y aunke e no ta historia propio, ta algo cu el a sinti y a pone den letra pa asina composita e cancion nobo aki.
Den comunidad por a tuma nota di diferente accion y manifestacion relacion cu abuso (mucha,pareha y mas) pero den su caso Ritmo a enfoca mas riba e sentimento delicado di abuso di e confiansa cu cada persona ta deposita den un otro. For di Hulanda Ritmo a observa tur locual tabata tumando luga aki na Aruba y cu esey a profundisa / inspira na skirbi e cancion aki.
E cancion ta dirigi na tur hende pero muy particular na e hobennan, pa habri nan mente pa asina nan ta atento na ken nan ta confia, ken ta den bo cercania mirando cu abuso ta algo cu ta existi y ta presente tur dia den nos bida.
Mientrastanto Ritmo lo ta na Aruba pa un tempo indefini tanten cu e pandemia ta influencia e pasonan. Igual cu na Aruba, na Hulanda tambe e tin su efecto y como tal a opta pa bin cas y ta mas cerca di famia. Cu e decision di ta bek ta nifica tambe mas chens di por produci y ta e idea di tur siman presenta cancionnan nobo. Cu un mente hopi mas habri lo dedica na letranan mas profundo mirando e cambio di edad y experiencia. E ta menciona 24ora, cu ta e plataforma mas grandi di noticia, pero cu no ta mira hopi di e noticianan aki, debi cu e ta un asunto hopi personal y sensibel.
Conseho importante di parti Ritmo Real pa e hoben artista cu apenas ta cuminsa of kier cuminsa su carera artistico, e ta un balansa entre disciplina y oracion, pone meta bo dilanti tene bo mes na esaki y cu oracion (fe) bo ta logra. E no ta yega di awe pa mañan, e ta tuma su tempo pero Dios ta haci tur cos posibel. Locual cu e ta enfatisa cu su musica no lo cambia, pero ta tene na cuenta si cu locual cu hende wak di bo ta locual cu abo a presenta pa nan wak.
T-Drick cu ta producer di e cancion a keda sorpresa cu e artista Ritmo Real.
Na momento cu a acerca T-Drick pa colabora y traha e beat pa e cancion nobo, e no por a caba di sali di e asombro di e artista cu e tabata scuchando. Un Ritmo Real mas madura y cu letranan “fresh” cu a inspir’e mes ora na produci algo yena di sentimento. Entre combinacion di cantica conoci y beat nobo a sali un cancion hopi “deep” y cu ta accentua e letranan cu kier pa yega na e publico.
T-Drick tambe ta conta cu produccion di un cancion nobo ta depende di hopi factor y si como productor na e momento ey bo ta inspira den e tipo di cancion cu kier produci. Tur cos ta depende, tin biaha e por ta un ora of tin biaha dias. Pa locual ta trata e cancion aki “24ora” ta algo cu a sosode den oranan di marduga pa connect cu e momento ey, cu e pensamento cu den e oranan ey hopi ta esnan cu lo tuma tempo y scucha y biba cu e cancion. Ta purba traha cu e energia cu e cantica mester, ta locual T-Drick a bisa.
Di otro banda T-Drick mes, cu ta un productor excepcional y di trayectoria sumamente exitoso, tin hopi plan na caminda, entre nan e album di Biggy Boy For Ever cu e ta e “main producer” di dje, como tambe produccionnan bou DjT caminda lo feature cu artistanan grandi como plan pa futuro.
Sea agradecido cu locual cu bo tin, haci oracion tur dia, ora situacion tabata bon a lubida amor di famia demas, y e temponan aki cu nos ta den crisis a siña nos y pone nos realisa cu mester ta agradecido y busca den e tempo dificil aki kico realmente bo gusta y bo ta resalta den dje, traha riba dje y perfeccion’e pa 2021 ta un comienso nobo pa tur hende, T-Dirck ta finalisa.
