Dia 26 di maart awo Corte lo dicta sentencia den e caso penal cu Ministerio Publico a cuminsa contra Richi Danies. Diabierna mainta a trata su caso, via video call, durante cual a repasa e 11 acusacionnan cu tin contra di dje.
Ministerio Publico a informa cu ta acusa Danies di a menasa hende cu morto (su mama) y di a instiga hende contra otro riba 30 di september 2020 (riba rednan social). Tambe a acus’e di intencionalmente destrui propiedadnan di un banco y di un departamento di gobierno riba 28 di juli 2015. E ta wordo acusa di a causa daño na propiedad di un instancia riba 5 di april 2016 y di propiedadnan di un departamento di gobierno riba 13 di april 2016 y di warda di Polis na Noord y Santa Cruz riba 2 di mei 2016. Tambe a acus’e di a viola Toque De Queda riba 28, 30 y 31 di augustus y tambe riba dianan 3, 4, y 5 y 6 di september 2020.
Banda di esaki a acus’e di menasa un polis cu morto riba 3 di juli 2020, door di bise: “Bay den ***** di bo mama, yiu di ****. No worry, mi sa unda bo ta biba. Mi lo topa bo bek riba caya y bo lo wak kico lo pasa cu bo. Bo no ta bay scapa mi. Mi ta bay prepara pa bo. Bo bida ta den peliger”. E ta wordo acusa di a resisti detencion door di tres agente policial riba 27 di juli 2020. E ta wordo acusa di a publicamente insulta un polis (femenino) na pia di su trabao riba e mesun fecha aki. Tambe e ta wordo acusa di a pone un borchi sin permiso di minister riba caminda publico riba 27 di juli 2020.
El a nenga e menasa y insulto y a bisa cu e no ta interesa pa bay bou di guia di Reclassering of Psikiatra. Su mama Aida Danies lo bay busca un ordo di restriccion pa evita cu e ta yega cerca di dje. Den pasado caba e mama a bisa cu e no ta sinti su mes sigur cu Richi den cas. Su abogado, mr. Doris Candwood lo cana e caminda pa pidi un ordo pa e keda leu di e mama y di e cas unda e tabata biba.
