Richard Tromp di 66 aña di edad ta un ex pashent di COVID-19. E no a spera di haya complicacion cu curason y COVID-19 na mes momento. E no a hay’e manera otro hendenan, pasobra e tabatin e virus pero ningun sintoma y no a perde smaak, ni holo ni keintura.
Dia 20 el a lanta cu un dolor fuerte na pecho y a yama su dokter di cas. Dr. Gerrit Croes a splic’e cu e sintomanan ey no ta di COVID-19 sino di curason y a bis’e pa yama ambulance. El a yama 911 y nan a bis’e pa yama dokter di cas, pero door cu e dolor tabata bira mas fuerte Tromp a opta pa subi su auto y bay hospital.
Na Eerste Hulp di biaha nan a mira con malo Tromp tabata. Dr. Dennert a presenta pa bis’e cu e ta hayando un ataca di curason. Nan a prepar’e pa opera, pero den e preparacion el a bay fo’i tino. Durante cu e tabata den sala di operacion, nan a test y e resultado a sali positivo. E tabata den piso di cuido intensivo, unda cu nan a inform’e cu su pulmonnan a yena cu likido y su curason tabata bay bon. El a lucha pa salud contra tres cos, esta pulmonnan cu likido, curason y COVID-19 cu tabatin su pulmonnan infecta na 65%.
Pa Tromp e trato cu el a ricibi na Eerste Hulp (SEH) tabata hopi profesional. El a lesa y tende cu hendenan ta bisa negligencia medico, e no sa si tabata su suerte e dia of con pero e sa cu Dios a obra. Na yegada, Tromp ta corda di a mira dr. Dennert y ta kere cu el a atende un otro pashent di curason. E ta gradici na e dokter pa scapa su bida, tambe di e bon trato cu el a ricibi na Eerste Hulp.
Durante su estadia den ICU, nan a trat’e bon, esta su specialista di pulmon dr. Kock y cardiologo dr. Cheng.
Tabatin dos dokter cu a yud’e cu e tratamento di COVID-19. Despues cu el a sali for di hospital siman pasa diasabra, Tromp a bisa di tabata COVID Free. Un problema cu e tin ta halamento di rosea, pero a bis’e cu terapia ta yuda. Ainda e tin 4 pa 5 siman mas pa bay recupera, pero e no por bay su cas ainda y p’esey ta keda otro caminda. E tin dos ruman na su cas cu mester test negativo.
Dr. Croes ta su dokter di cas, pero tambe ta su amigo y tur biaha cu e yam’e, e ta atend’e. Tromp a bisa cu su pulmonnan tabata afecta caba p’e virus y no tabata sinti nada, pero despues cu su ruman y mama a test positivo, el a ripara cu e tambe tin’e.
Richard Tromp ta confundi pa loke ta trata e sintomanan, pasobra ta haya cu e sintoma di ataca di curason ta casi mescos cu esun di COVID. Tur biaha cu el a sinti e sintoma di curason, el a kere ta COVID. Un conseho e tin ta pa hendenan sigui e instruccionnan pa evita di sali, pasobra nunca el a spera cu e lo haya e virus aki.
