Recientemente Arubaanse Voetbal Bond a eligi su directiva nobo. A reeligi Ing. Richard Dijkhoff como Presidente di e asociacion di futbol.
A scoge den e prome tanda di e votacion y awo e ta cla pa asumi su retonan nobo relaciona cu e periodo nobo.
Ing. Richard Dijkhoff a manifesta cu e ta hopi contento pa a wordo reeligi, pero mas cu tur cos e ta contento di por continua cu e trabao cu el a inicia. “Esey pa mi ta mas importante cu pa un periodo di 4 aña. Pasobra e oportunidad cu nan a duna mi, e confianza cu mi a ricibi, pasobra segun mi a mira e resultado, e sala a papia cla, kiermen cu nan ta aprobando locual cu mi a inicia”, a bisa.
Presidente di AVB a indica cu e ta haya oportunidad di caba locual el a inicia y aworaki ta pone un presion un tiki mas grandi pasobra e tin un deber pa por logra locual el a permiti.
E ta contento cu e resultado, a enfatisa. Banda di esaki a agrega cu tin dos miembro nobo cu a drenta den e directiva y cu ta personanan cu tin curason pa futbol. E aporte cu nan lo bay duna pa por fortalece e directiva sigur no tin duda cu esaki.
“Mi ta yama nan bonbini den e team nobo. E prome cos cu nos ta bay haci ta sinta, reuni y palabra. Con nos ta bay haci e trabao e cuatro añanan nos dilanti”, Richard Dijkhoff a manifesta.
FIFA y CONCACAF lo ta dispuesto pa bin caba pa nan por duna e miembronan nobo splicacion riba con e federacion tin cu funciona. Den pasado tabata tin hopi problema riba e tereno aki pasobra no tabata tin comprension di e pakico “Nos tin cu haci locual cu nos a haci”, a agrega.
E federacion ta birando mas profesional y tin cu bay cuminsa mir’e como un compania. Tin tendencia di mir’e a base di boluntarismo, pero FIFA ta poniendo fondonan pa por yena na staff y haci e federacion mas profesional, Presidente re-electo di AVB, Richard Dijkhoff a expresa.
