Presupuesto di pais Aruba pa 2018 a keda aproba cu sosten di e tres fraccionnan cu ta sostene gobierno di coalicion. Fraccion di AVP sinembargo no a sostene esaki pa motibo di su preocupacion grandi relaciona cu maneho financiero pa e añanan venidero y e hecho cu ningun di e compensacion pa mitiga e perdida di poder di compra ta hinka aden. Miembro di fraccion di AVP, mr. drs. Richard Arends, ta mustra cu nan a constata den e presupuesto cu gastonan di gobierno a subi cu 20 miyon y cu esaki lo sigui subi durante e proximo cuater aña. E defensa di e coalicion cu lo a reduci e gastonan cu 20 miyon tabata un ‘smoke screen’ pa inicia e reunionan y prome cu e entrega cinco diferente nota di cambio. Di es manera aki tambe a crea un percepcion robes serca CAFT.
Entre otro sr Arends a sigui mustra riba un aumento den cantidad di personal cu 100 persona entre januari y februari 2018 y e cantidad aki ta bay sigui aumenta den proximo lunanan cu ta indicacion cu e maneho financiero cu gobierno mes a presenta na Parlamento. Gobierno sinembargo no a duna indicacion di e cantidad di personal nobo te cu mei 2018.
A nota cu durante tratamento di presupuesto cu inversionnan a conoce un aumento substancial di 55 miyon florin sin cu gobierno y ministernan por a duna un splicacion detaya riba e destino di e inversionnan of sikiera ki tipo di inversion esakinan lo ta. Compara cu realisacion di aña pasa, e gobierno actual a aumenta gasto cu 100 miyon di florin adicional.
Despues di a cuestiona y critica forma con gobierno di AVP a logra e metanan den añanan 2015 y 2016 cu entradanan incidental, bisando cu esaki no tabata structural, por a mira cu gabinete Wever Croes pa logra su metanan financiero pa cu presupuesto 2018, tambe a depende di entradanan incidental, manera dividendonan adicional di companianan estatal, manera Utilitirs y RDA y reservanan di Aruba Tourism Authority. Ta remarcable cu algun luna pasa gobierno, accionista unico di RDA, a indica cu e empresa no por a cumpli cu su obligacionan pa cu Pais y awor diripiente si. Esaki ta pone fraccion di AVP cuestiona seriamente e intencion di Gobierno pa no cobra su dividendo aña pasa manera cu e gabinete anterior a laga e presupuesto 2017.
Parlamenario Arends a sigui mustra cu na momento cu gobierno a dicidi di aumenta BAZV, e contribucion di dje nan e fondo di AZV ta reduci y mientras por tuma nota cu e landsbijdrage a baha, durante tratamento di presupueto e minister no a mustra con esaki lo traduci den un reduccion di deficit. E espacio financiero cu den presupuesto a wordo crea door di e reduccion di e Landsbijdrage, esaki ta wordo yena bek dor di maneho nobo anuncia pa gobierno.
Despues cu e tres fraccionnan cu ta sostene gobierno a aproba presupuesto 2018, a keda confirma e punto di fraccion di AVP, esta cu e presupuesto ta mustra cu entradanan ta 150 miyon florin menos cu gastonan cu gobierno tin, cu ta traduci su mes na un deficit di 3% di GDP.
E norma di 3% a wordo alcansa caba entre añanan 2015 y 2016 loke ta converti e presupuesto 2018 y tur esunnan cu lo sigui segun e cuadro financiero den e FEM entrega pa minister di finansa, den un aumento di e debe na luga cu mester a logra baha e debe na aña 2018.Pa hustifica e legalidad di esaki, Gobierno a desvia di e ley di supervision financiero cu un simple nota di cambio sin cu tin un acuerdo formal cu Reino.
Pa por financia e maneho nobo aki, gobierno a anuncia e ‘crisisheffing’ di 1% pa BAZV y 1.5% pa BBO cu lo mester drenta na vigor dia 1 juli venidero cu ta trece rond di 150 miyon di florin aden anualmente. Tambe lo aumenta accijnzen cu mas cu 12 cen pa logra e meta e 10 miyon di florin cu gobierno ta premira. “Si bo ta mara na un norma di 0.5% di surplus pa e aña introduccion di cualkier belasting nobo esaki lo por a wordo hustifica. Sinembargo Gobierno ta introduci un crisisheffing pa djies yega na e norma cu nos a yega tres aña pasa caba. No por yega na otro conclusion otro cu e “crisisheffing” aki ta un “coalitieheffing” pa por financia maneho nobo y Raad van Advies tambe a confirma esaki tambe den su carta na gobierno. “Den e proximo tres pa cuater aña e debe lo aumenta atrobe cu 300 miyon di florin te na momento cu yega cerca na un presupuesto balansa of surplus,” Parlamentario Richard Arends ta declara.
