Richard Arends: Debe di 90% di GDP nunca a existi

Un di e gritonan mas fuerte di e campaña di nos opositornan politico, como tambe e motivacion di un supervision financiero estricto y introduccion di medidanan manera e ‘crisisheffing’ tabata hecho cu lo tabata tin un debe descontrola y insostenible.

Un di e conclusionan mas importante di e cuentanan nacional pa añanan 2014-2017, publica pa Oficina Central di Estadistica, ta cu e ‘megadebe’ di mas di 90% di GDP nunca a existi. Esaki ta un confirmacion cu e modelo economico di gobierno anterior a funciona debidamente cu a resulta den un crecemento economico reduciendo e impacto di e debe nacional riba nos economia.


Finanzas publico tabata e area di maneho mas transparente durante e ultimo añanan. For di aña 2014 a entrega na Parlamento 3 presupuesto, 3 presupuesto supletorio, 3 cuenta anual y reportenan di entradanan y gastonan di Pais Aruba pa 10 cuartal consecutivo. Tur e documentonan aki ta den dominio publico y tur cifra den a wordo suministra door di Departamento di Finansa, Departamento di Impuesto, di Aduana y a wordo controla y revisa pa Rekenkamer y Colegio di Supervision Financiero temporario di Aruba, CAFT. Cu e publicacion recien pa Oficina Central di Estadistica, e debe nacional den e aña di eleccion tabata 76%. Si pone esaki den contexto di e crisis mundial, cierre di e refineria prome cu 2012 y e riesgonan cu finanzas publico a corre si no a reforma e fondonan di pensioen, ta un desaroyo conforme cu e desaroyo e debe nacional si compara cu otro pais.

Na final di 2017 a crea un situacion crisis financiero pa por hustifica introduccion di medidanan cu un peso di 270 miyon di florin. Cu e datonan nobo nos por conclui cu e  argumentonan pa hustifica un crisisheffing y e prome fase di e asina yama reforma fiscal ta keda elimina. Na mes momento por cuestiona e intervencion di Hulanda cu e presupuesto 2014, CAFT y un protocol hopi mas invasivo na 2018. Spera cu Gobierno por usa e posicion bentahoso aki pa por mehora su posicion pa loke ta trata e prolongacion di CAFT, como tambe e entradanan adicional cu ta premira cu e reforma fiscal cu awor ta resulta di no ta necesario.


Loader Loading…
EAD Logo Taking too long?

Reload Reload document
| Open Open in new tab

Download [51.24 KB]

E datonan nobo ta indica cu tabata tin un crecemento economico durante e ultimo añanan y gabinete anterior a laga un fundeshi solido sigui laga nos economia crece. E debe nacional a desaroya su mes, manera cu e protocol di 2014 a premira: crecemento economico combina cu e reduccion structural di e deficit. Loke nos a wak for di final di aña 2017 na momento cu e gabinete actual a inicia nan gobernacion ta un deterioro di e situacion financiero: un presupuesto balansa a keda extendi, no tin miras pa un crecemento economico y debe ta aumenta enbes di a baha manera e ley di supervision financiero a prescribi originalmente.  

Oficina Central di Estadistica a publica recientemente e cuentanan nacional y a determina e cremento economico pa e añanan 2013-2017, pero Gobierno no a trece dilanti e enbergadura di e conclusion manera mester ta. Cu e datonan nobo di Oficina Central di Estadistica a base di e cuentanan nacional, por mira claramente cu e modelo economico di Gabinete Mike Eman II a duna su fruto y cu tabata tin un crecemento economico substancial.