Richard Arends: CAFT ta confirma aumento di gasto

Den un carta cu a wordo publica ayera, Colegio di Supervision Financiero pa Aruba (CAft) ta confirma cu e deficit di presupuesto 2018 a wordo ocasiona principalmente door di intensificacion di gastonan di e gobierno nobo.

Esaki ta contrario na loke e gobierno di coalicion a purba pone hende kere te awor: esta cu e deficit lo a wordo ocasiona pa un supuesto mal maneho financierio di e gabinete anterior. “CAft ta contradeci esaki y ta urgi Gobierno pa duna mas splikacion riba su maneho financiero riba termino largo, como tambe con e tin pensa di cubri e gastonan di e pakete di compensacion,” Parlamentario Richard Arends pa fraccion di AVP a declara.

Den su carta, CAft a pidi Gobierno pa duna mas claridad riba e cuadro financiero como parti di e Financieel-Economisch Memorandum (FEM, riba aumento di personal y intensificacion di otro gastonan. Tambe CAft ta pidi claridad riba riba compensacionan cu Gobierno a anuncia pa mitiga efectonan di e ‘crisisheffing’ cu lo por surpasa 100 miyon di florin. Esakinan no a wordo presenta den e presupuesto, ni tampoco den e cuadro financiero. “Si wak atras durante tratamento di presupuesto, Gobierno no a parce di a duna oido na e contenido di e carta aki mirando cu despues di 5 nota di cambio, Gobierno a aumenta e gastonan substancialmente y a pone e ley di supervision financiero simplemente un banda. Tur esaki a sosode sin cu CAFT tabata na altura,” Parlamentario Richard Arends a bisa.

Den un analisis recien, Parlamentario Richard Arends a conclui cu e gastonan di Gobierno a aumenta cu 125 miyon di florin pa aña 2018 – principalmente gastonan coriente, gastonan di oficina, di personal y di inversion – compara cu e realisacion preliminario di presupuesto 2017. Pa cubri e gastonan aki Gobierno lo introduci un ‘coalitieheffing’ cu ta consisti di un aumento di entradanan cu mas di 130 miyon di florin cu a base di di aumento di BBO, BAZV y accijns, pero tambe di entradanan incidental na balor di mas di 40 miyon di florin na dividendonan di empresanan estatal, reservanan y demas fondonan publico. “E preocupacionan cu CAFT a presenta ta e mesun preocupacion cu nos di oposicion a trece dilanti durante tratamento di presupuesto, pero esakinan no a wordo tuma na serio door di Gobierno ni tampoco door di fraccionan cu ta sostene e coalicion den parlamento,” Sr. Richard Arends a sigui bisa.

Na inicio di e tratamento di presupuesto Gobierno a pretende di lo a reduci gasto, pero finalmente no tabata tin ningun esfuerzo sincero pa reduci e deficit bou di e norma acorda cu CAft,” asina Sr. Arends a declara. “Tur cos ta indica cu Gobierno di Aruba a tuma CAft hasi.” Den algun siman e conseho definitivo di CAft riba e presupuesto 2018 lo wordo publica. E pregunta ta keda entretanto si CAft lo bay di acuerdo cu esaki, of Conseho di Minister di Reino lo opta pa un aanwijzing ancra den un Decreto Real. “E contenido di e carta di CAft no solamente ta confirma e aumento excesivo di gasto, pero den caso cu bin un KB, esaki lo ta riba priopio merito di e gobierno actual”, Parlamentario Richard Arends a finalisa bisando.